Өрөспүүбүлүкэтээҕи 2 №-дээх балыыһа-Суһал медицинскэй көмө киинигэр нэһилиэнньэҕэ хаачыстыбалаах медицинскэй көмө оҥоһулларыгар үгүс үлэ ыытылынна. edersaas.ru
Ол туһунан кылгастык кэпсииригэр балыыһа кылаабынай бырааһа Борис Андреевтан көрдөстүм:
– Ааһан эрэр сыл түмүктэрин таһаарар уонна инники былааннанар кэм дьэ, тиийэн кэллэ.
Биһиги иллээх-эйэлээх кэлэктииппит нэһилиэнньэҕэ оҥоһуллар медицинскэй өҥө хаачыстыбалаах уонна табыгастаах буоларыгар элбэх үлэни ыытта. Ол курдук, эндохирургия сайдар, артроскопическай эпэрээссийэлэргэ сайдыы саҥа түһүмэҕэр киирдибит. Бэйэбит базабытыгар тымныыттан эчэйиини эмтиир саҥа киин аһылынна.
Өрөспүүбүлүкэ эмтиир, ыарыыны сэрэтэр тэрилтэлэрин ортолоругар клеточнай технологияларга инники кэккэҕэ сылдьарбытын киэн тутта этэбин.
Босхо медицинскэй көмөнү оҥорууга судаарыстыбаннай мэктиэ бырагырааматын уонна үрдүк технологиялаах көмө эбэһээтэлистибэлэрин барытын толордубут.
Уһуну-киэҥи өйдөөн, ырааҕы көрөн үлэлииргэ дьулуһабыт. Ол туоһутунан РФ Доруобуйа харыстабылын министиэристибэтин федеральнай телемедицинскэй ситимигэр киирбиппит буолар. Ону сэргэ, быйыл Н.В.Склифосовскай аатынан суһал көмө научнай-чинчийэр институтун, А.В.Вишневскай аатынан хирургия институтун кытары Сөбүлэһии түһэристибит.
2018 с. искусственнай интеллеги киллэриигэ үлэбитин саҕалыахпыт.
Бэйэм биир идэлээхтэрбин үчүгэй үлэлэрин иһин махтанабын. «Саха сирэ» хаһыат уонна «Эдэр саас» сайт ааҕааччыларын кэлэн иһэр Саҥа дьылынан эҕэрдэлиибин! Дьолу-соргуну, доруобуйаны, ситиһиилэри уонна дьиэ кэргэҥҥитигэр нус-хас олоҕу баҕарабын!
Надежда ЕГОРОВА, «Саха сирэ» хаһыат, edersaas.ru