Дьаҥы намтатар туһуттан хааччахтыыр миэрэлэри тутуһуу салҕанар.
Өрөспүүбүлүкэҕэ эпидемиологическай балаһыанньа кэнники нэдиэлэҕэ бигэтийдэ. Улуустарга ыалдьааччы ахсаана намырыыр, оттон Дьокуускайга сыыппара хамсаабат, биир тэҥник турар. Ол да буоллар, коронавируһу тарҕаппат туһуттан, хааччахтыыр миэрэлэри өссө да тутуһар ордуга бэлиэтэнэр: мааскалаах сылдьыы, бэйэ икки ардыгар социальнай тэйиччи буолууну тутуһуу, дезинфекциялааһыны тэрийии.
Ил Дархан Айсен Николаев бүгүн, кулун тутар 9 күнүгэр, өрөспүүбүлүкэтээҕи суһал ыстаабы кытары уочараттаах сүбэ мунньаҕы ыытарыгар, хоруона хамсыгынан ыараханнык ыалдьыбыттар ахсааннара төһө да аччаабытын иһин, киһи өлүүтэ син биир тахса турарын бэлиэтээтэ. Күн-дьыл сылыйыытыгар аны ОРВИ уонна кириип кэмэ саҕаланарын учуоттаан, хааччахтыыр миэрэлэри тутуһууну салгыыр наадатын тоһоҕолоон ыйда.
Вакцинацияны ылыы тэтимэ нэһилиэнньэҕэ куһаҕана суоҕа бэлиэтэннэ. Ордук тыа сирдэрэ быһыыны көхтөөхтүк ылыылара салҕанар. Оттон Дьокуускай куоракка бырааһынньык күннэригэр быһыыны биэрии тэтимэ арыый бытаарбыт, ол гынан баран бу хайысхаҕа, ону сэргэ судаарыстыба өҥөтүн оҥорор портал нөҥүө нэһилиэнньэ сурутуутугар үлэ күүһүрдүллүбүт. Быһа холоон, кулун тутар 16 күнүн кэнниттэн, Саха сиригэр өссө 14 тыһыынча доза вакцина кэлэрэ күүтүллэр. Бу туһунан СӨ Бырабыыталыстыбатын вице-премьерэ, өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрдэ.
Кини быйыл кулун тутар 9 күнүнээҕи чахчынан, өрөспүүбүлүкэ сиригэр-уотугар хоруона хамсыгынан барыта 32 тыһыынчаттан тахса киһи ыалдьыбыта бэлиэтэммитин эттэ. Итинтэн 95,8% үтүөрбүт. Оттон ааспыт хонукка Саха сирин үрдүнэн барыта 37 киһи коронавирустаабыт. Итинтэн 27-тэ Дьокуускай куоракка олорор. Улуустарыгар дьаҥнаабыт киһи баара билиннэҕинэ, олохтоох суһал ыстааптарынан бары миэрэлэр уталытыллыбакка ылыллаллар.
Роспотребнадзор Саха сиринээҕи салаатын салайар Маргарита Игнатьева иһитиннэрбитинэн, ааспыт нэдиэлэҕэ уопсайа 7,5 тыһыынча киһи ОРВИлаабыт, бу өрөспүүбүлүкэҕэ нэдиэлэтээҕи көрдөрүүттэн 18,4%-нан үрдүк. Манна үстэриттэн алталарыгар уонна 7-14 саастаах оҕолор ордук ыалдьыбыттара бэлиэтэммит.
Маныаха ааспыт нэдиэлэни кытары тэҥнээххэ дьаҥнааччы ахсаана ордук Алдан, Анаабыр, Ленскэй, Мииринэй, Нам, Нерюнгри, Өймөкөөн, Уус Алдан, Уус Маайа, Усуйаана, Хаҥалас оройуоннарыгар элбээбитэ бэлиэтэммит. Оттон Дьокуускайга ОРВИ 14% үрдээбит. Сүрүннээн ыалдьааччылар 7-14 саастаах оскуола оҕолоро. ОРВИ-ны намтатарга оскуолаларга, уһуйааннарга дезинфекция ытыллара, дьиэни салгылаталлара, кыраадыһы мээрэйдииллэрэ, санитайзердары туһаналлара наада.
Хоруона хамсыгар тохтоотоххо, ааспыт нэдиэлэҕэ өрөспүүбүлүкэ лабораторияларыгар 10 249 анаалыс оҥоһуллубут. Маныаха Маргарита Игнатьева билигин ОРВИ-нан сибээстээн, хааччахтыр миэрэлэри тутуһар наадатын бэлиэтиир. Өрөспүүбүлүкэ сүрүн санитарнай бырааһа бу күннэргэ итиннэ туһаайан сөптөөх этиилэри Ил Дархан көрүүтүгэр киллэриэ.
Хаартыскаларга Мария Васильева (СИА) түһэриилэрэ
+1
+1
+1
+1
+1
+1
+1