Өрөспүүбүлүкэҕэ бэйэни хааччахтаныы эрэсиимэ кулун тутар 15 күнүгэр диэри уһаата. Бу туһунан СӨ Ил Дарханын ыйааҕа таҕыста.
Кулун тутар 1 күнүгэр диэри коронавируснай инфекциянан ыалдьыы аҕыйаата эрээри, ыарыы суох буолбата. Күн аайы 40-45 киһи ыалдьар. Онон хааччахтаныы эрэсиимин уһатар туһунан Ил Дархан Айсен Николаев ыйааҕа таҕыста.
Кулун тутар 1 күнүттэн сорох хайысханан сымнатыы киирдэ. Ол курдук, спортивнай тэрилтэлэр сарсыардааҥҥы өттүгэр эрэ үлэлиир көҥүллээхтэрэ. Билигин бу хааччах уһуллан, киэһээҥҥэ диэри үлэлиэхтэрин сөп буолла.
65-тэн үөһээ саастаах уонна олоҕурбут ыарыылаах дьоҥҥо бэйэни хааччахтанан олоруу эрэсиимэ салҕанар. Бары мааскалаах уонна харыстанар миэрэлэри тутуһа сылдьарбыт ирдэнэр.
Билиҥҥи туругунан, 1-кы уонна 3-с Өрөспүүбүлүкэтээҕи балыыһаларга коронавируһунан ыалдьыбыт дьону эмтиир реанимация куойкалара сабылыннылар. Дьокуускайдааҕы килиниичэскэй балыыһаҕа миэдиктэр ковиды утары охсуһаллар. Саас кэлэн, тумуу, кириип элбиир туруктаах, онон ыарыы намыраата диэн ыһыктынан кэбиһимэҥ, бэйэҕитин харыстана сылдьыҥ.
Ангелина Васильева, edersaas.ru
Хаартыска — СИА.