Хааччахтаныы эрэсиимэ бэс ыйын 26 күнүгэр диэри уһаата

Бөлөххө киир:

Бүгүн, бэс ыйын 19 күнүгэр Ил Дархан Айсен Николаев өрөспүүбүлүкэҕэ коронавирус тарҕаныытын туһунан быһа сибээскэ тахсан кэпсээтэ.

edersaas.ru

—Хомойуох иһин, балаһыанньа тупсубат. Ааспыт суукка иһигэр  коронавирус дьаҥынан 97  киһи эбии ыарыйда. Ыалдьыбыттартан 68 Дьокуускай куорат олохтооҕо, 29 ыарыһах өрөспүүбүлүкэ 8  улууһугар бэлиэтэннэ. Кэнники  күннэргэ  Дьокуускай куоракка ыалдьыбыт дьон ахсаана сууккаҕа 70-чаҕа тиийэн  тохтообут буоллаҕына, улуустаргы көрдөрүү үрдүү турар. Манна киин куораттан сайыҥҥы сынньалаҥҥа, уоппускаҕа тиийбит оҕолор, улахан дьон ыарыыны  тарҕаталлара  бэлиэтэнэр. Кэккэ улуустарга уонунан киһи ыалдьан уустук балаһыанньа үөскээтэ. Улуустар суһал ыстааптара  ыарыы салгыы тарҕамматын туһугар үлэни күүскэ ыытыахтаахтар, хааччачтаныы миэрэтин  ылыныахтарын эмиэ сөп.

 Айсен Николаев  маасканы кэтии эрэсиимэ киин куоракка да, улуустарга да сөптөөхтүк  тутуһуллубатын бэлиэтээн эттэ.

 —Аҕыйах хонуктааҕыта ыарыы тарҕаныытын коэффициена 0,8% тэҥнэһэ сылдьыбыт буоллаҕына, билигин 1,24 суотайга тиийдэ. Онон өрөспүүбүлүкэ «кыһыл зонаҕа» киирэн, хааччахтаныы эрэсиимэ  уһуллуутун туһунан кэпсэтии суох. Өрөспүүбүлүкэтээҕи суһал ыстаап бүгүҥҥү мунньаҕар, билиҥҥи  хааччахтаныы эрэсиимин өссө биир нэдиэлэ, бэс ыйын 26 күнүгэр диэри, уһатарга диэн быһаарыыны  ылынныбыт.  

Дьаҥ туруоҕуттан өрөспүүбүлүкэ үрдүнэн барыта  3486  киһи ыарыйда, 30 киһи ыарахан туруктаах. Оттон 2197 киһи үтүөрдэ.

Ньургуйаана Иванова, «Саха сирэ» хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0