Санитарнай-эпидемиологическай балаһыанньа кытаатан уонна өрөспүүбүлүкэ кылаабынай санитарнай бырааһа этии киллэрбитинэн, Саха сиригэр коронавирус дьаҥын тарҕаныытын утары миэрэ күүһүрдэ. Манна аналлаах Ыйаахха бүгүн Ил Дархан Айсен Николаев илии баттаата.
Ол чэрчитинэн, успуорт бары тэрээһиннэрэ көрөөччүтэ суох ыытыллыахтара. Бары тыйаатырдарга, култуура дьиэлэригэр көрөөччүлэринэн толоруу 50 % кыччыыр. Ыраахтан олорон үөрэтии кэмигэр оҕолор аралдьытар-оонньотор кииннэргэ сылдьаллара бобулунна. Ону тэҥэ, дьиэ кэргэн чилиэниттэн биирдэрэ эмит вируснай инпиэксийэнэн ыарыйдаҕына (ОРВИ) уонна коронавируһунан ыалдьыбыт дьону кытта хантаактаах буоллахтарына, ону тэҥэ, тас дойдуттан кэлбит дьон хааччахтанан олоруулара 14 күнтэн 7 күҥҥэ диэри кыччаан биэрдэ.