Бэйэни хааччахтаныы эрэсиимин хаһааҥҥа диэри тутуһабытый?

Бүгүн, бэс ыйын 11 күнүгэр, Ил Дархан Айсен Николаев бэс ыйын 15 күнүттэн хааччахтааһыны устуу бастакы түһүмэҕэ саҕаланарын туһунан нэһилиэнньэҕэ анал этиитигэр кэпсээтэ.

Суһал штаб салайааччытын солбуйааччы Ольга Балабкина дьон интэриэһиргиир ыйытыыларыгар хоруйдаата.

— Хааччахтаныы эрэсиимин тутуһабыт дуо?

— Хаачахтаныы эрэсиимэ баар Дьокуускайга уонна атын нэһилиэнньэлээх пууннарга эрэсиим от ыйын 22 күнүгэр диэри буолуоҕа.

Бэс ыйын 15 күнүттэн бытовой өҥөлөрү оҥорор тэрилтэлэр эрэ үлэлиэхтэрэ: парикмахерскайдар, массаас, кэрэ буолуу солуоннара,  косметическай уонна спа-кииннэр. Бу тэрилтэлэр санитарнай нуормалары тутуһан үлэлиэхтэрэ.

Успуорт саалалара уонна киинэ тыйаатырдара, билиҥҥи туругунан, арыллыбаттар. Баҕар, иккис түһүмэххэ Роспотребнадзор ыйбыт ирдэбиллэрин тутуһан үлэлээн саҕалыахтара.

— Өрөбүллэргэ маҕаһыыннары дезинфекциялаан бүттүлэр дуо?

— Өссө даҕаны буолаллар. Субуотаҕа уоптабай баазаларга санитарнай сууйуу ыытыллыаҕа.

— 65-ттэн үөһэ саастаах дьон дьиэлэриттэн тахсыахтарын сөп дуо? Оттон сааһын ситэ илик оҕолор? Уулуссаҕа социальнай дистанцияны тутуһабыт дуо?

— Бу дьаһаллар барыта уруккуларынан хаалаллар.

— Тэйиччиттэн үлэлиир эрэсиимнээх тэрилтэлэр хайдах үлэлииллэрий?

— Син биир тэйиччиттэн үлэлэрин салҕыыллар. 65+ саастаах дьон «больничнай» ылаллар.

— Арыгы атыылыыр маҕаһыыннар урукку кыраапыктарынан үлэлииллэр дуо?

— Билиҥҥитэ, суох. Саҥа ылыныллыбыт эрэсиим кэминэн үлэлииллэр.

edersaas.ru