Маны аах Уопсастыба

Хаһыат тэрийбит маастар-кылааһа сэҥээриини ылла

Бүгүн «Саха сирэ» хаһыат,  Эдэр саас.ру саайт тэрийиилэринэн сибэкки олордооччуларга, оҕуруотчуттарга маастар-кылаас ыытылынна.

Маастар-кылааһы хаһыаппыт, саайтпыт дьоруойа, Ньурба улууһун Маар орто оскуолатын физкултуураҕа учуутала Афанасий Васильевич Семенов ыытта. Тэрээһин «Сахамедиа» холдинг пресс-киинигэр буолла, болҕомтону улаханнык тарта, сэҥээриини ылла.

Үүнээйини олордуунан дьарыктаналларын сөбүлүүр хаһаайкаларга Афанасий Васильевич сибэккини бүөбэйдээн үүннэрии, көрүү-харайыы, эбии аһатыы, үөнтэн-көйүүртэн харыстааһын туһунан, о.д.а. элбэх туһалаах сүбэлэри биэрдэ. Хайдах быһары-отору, олордору көрдөрдө. Маастар-кылаас Эдэр саас.ру саайт Телеграм-ханаалыгар  быһа эпииргэ таҕыста. Маны сэргэ, саайтка уонна хаһыакка тахсыаҕа.

Мария Мигалкина:

— Мин тыа сириттэн киирэ сылдьабын. 35 сыл агрономнаабытым. Билигин бочуоттаах сынньалаҥҥа олоробун. Киһи сааһын тухары үөрэнэр. Ол иһин маннык тэрээһиннэргэ куруук сылдьа сатыыбын, наһаа сэргиибин.

Афанасий Семеновы истиэхпиттэн хайгыыбын. Кинини кытта былырыыҥҥыттан сибээстэспитим, сибэкки ылан олордубутум. Онон бу маастар-кылаас ыытылларын истээт, манна кэлэргэ тута быһаарыммытым. Саамай сөптөөх кэмигэр бэркэ тэрийбиккит. Тэлгэһэлэрин киэргэтэллэрин, сибэккинэн симииллэрин сөбүлүүр хаһаайкаларга наадалаах маастар-кылаас буолла. Бу курдук тутан олорон сүбэ-ама ылар, сибэккини хайдах олордортон саҕалаан ханнык уоҕурдууну туттары билэр хайаан да наада. 

 

Татьяна Кычкина:

—Мин кэтэх дьиэлээхпин. Сибэкки, оҕуруот аһын олордобун. Үүнээйини олордуу хайдах курдук сыралааҕын билэбин. Хата, Афанасий Семенов батсаап бөлөҕөр баар буоламмын, бэртээхэй сүбэлэри ылабын. Сааһырбыт киһи үөрэнэрэ элбэх.

Хата, бүгүн манна сылдьан үөрдүм аҕай. Махтанабын.  Дьоҥҥо наадалаах, туһалаах тэрээһин буолла. Өссө да бу курдук тэрийээриҥ.

 

Надежда Олесова, Тулагы:

Үүнээйини олордуунан саҥа дьарыктанабын. Афанасий Васильевич олордубут сибэккилэрэ батсаабынан тарҕаммыттарын көрөн бараммын, Саха сиригэр маннык олордоллор эбит дуу диэн наһаа сөхпүтүм. Онон бу маастар-кылааска ыҥырбыттарыгар, үөрүүнэн кэллим. Афанасий Васильевич кэпсиирин, быһаарарын тутан олорон иһиттим, элбэх сүбэни-аманы ыллым. Маастар-кылаас биир чаас буолбута биллибэккэ да хаалла. Афанасий Васильевичка, ийэм кэтэһэр «Саха сирэ» хаһыатыгар улахан махтал.

 

Маастар-кылааска сылдьыбыттар сүргэлэрэ улаханнык көтөҕүлүннэ. Тэрээһин түмүктэммитин да кэнниттэн, хаһыаппыт, саайтпыт дьоруойун Афанасий Васильевиһы ыыппакка тулалаан туран ыйытыы бөҕө биэрдилэр, үөрүүлэрин үллэһиннилэр. Кэпсэтии үлэ хоһугар салҕанна.

Киһи сөҕө, кэрэхсии, хайгыы көрөр сибэккилэрэ. Ама, ким маннык олордуон, тиэргэнин тупсарыан баҕарыа суоҕай? Бу Афанасий Семенов олордор сибэккилэрэ.

 

5
0
Telegram @edersaas20