Хаһыатчыт-суруналыыс ааҕааччыларын кытта сирэй көрсүһэрэ хаһан баҕарар долгутуулааҕын, күндүтүн ааһан туһалаах. “Саха сирэ” хаһыат айар үлэһиттэрин Үөһээ Бүлүүтээҕи сырыылара бу быраабылаттан туораабата. Арай, уруккуттан уратыта диэн, хаһыат икки сыл босхо тарҕаммытыттан дьон сыһыана арыый уларыйбыта кэпсэтии тыыныгар биллэр.
Ааҕааччыларбыт: “Хаһыаккытын тоҕо биир-биэс харчыта суох тарҕанар оҥорбуккутуй? Дьон босхону сыаналаабат”, — диэтэхтэринэ: “Биһиги кыра дьоммут. Үөһээҥилэр оннук быһаарбыттарын хайыахпытый”, — диэн куотуна сатыыбыт. Көрсүһүүлэргэ сырыттахпыт аайы кумааҕы хаһыаттан тэйэ быһыытыйбыт ааҕааччыларбыт илиилэригэр “өҥнөөх”, халыҥ хаһыаппытын туттаран билиһиннэрэбит. Оччоҕо тутан-хабан, эргитэн-урбатан көрөн-ааҕан баран, “хаһыат чахчы уларыйбыт, атын буолбут эбит” диэн итэҕэйэллэр.
Ити “өҥнөөх”, 40 балаһалаах хаһыаппыт быйыл сайыҥҥыттан ыйга биирдэ тахсан, атыыга тарҕанар эбит буоллаҕына, 2019 сыл бастакы аҥаарыгар нэдиэлэ көтө-көтө, ыйга иккитэ тахсар буолуоҕа. Онно биһиги, суруналыыстар, туох баар толкуйбутун уонна дьоҕурбутун ууран туран үлэлиибит. Онон ааҕааччыларбыт күннээҕи олох-дьаһах иирбэ-таарба кыһалҕаларыгар ырытыылаах матырыйааллары, эгэлгэ талбыт сүбэлэрин, сэһэннэрин, дьикти кэрэхсэбиллээх түгэннэри абааһытыттан имэҥнээх тапталга тиийэ аахтахтарына – сүүйтэриэхтэрэ суоҕа, өссө барыстаах хаалыахтара. Үөһээ бүлүүлэр ону бастакынан өйдөөтүлэр уонна күргүөмүнэн суруттардылар.
Сурутуу ыытыллара ордук
Георгий Степанов, Үөһээ Бүлүү сэлиэнньэтин олохтооҕо, биэнсийэлээх:
— Босхо хаһыаты билигин, маҕаһыыҥҥа сытарыгар түбэстэхпинэ, дьиэбэр илдьэ баран ааҕабын. Ардыгар, бүппүт буоллаҕына, матан хаалабын. Киһи бэйэтин харчытыгар атыыласпытын хаһан баҕарар харыстыыр. Онон хаһыакка сурутуу ыытыллара ордук дии саныыбын. Ити гынан баран, Бүлүү умнаһын олохтоохторо харчытыгар наар ночоотурарбыт хайдах эрэ. Дотация көрөн, киин уонна илин эҥээрдээҕи улуустар сыаналарын кытта тэҥнээн биэрэргит буоллар. Итиэннэ өссө уруккуттан туруорсар-этэр санаабын хатылыыбын: электроннай сибээс сайдыбыт кэмигэр Дьокуускайтан бэлэм макеты ыыттаран, Бүлүү куоракка бэчээттээн, бу эргиннээҕи улуустарга тарҕатар буоллар, почта өҥөтө ааҕыллыбакка, быдан чэпчиэх этэ.
Василий НИКИФОРОВ, «Саха сирэ» хаһыат, edersaas.ru