Хаҥаластар Саха тыйаатырыгар “Күөртээх Күөрдэм” дьүһүйүүнү көрдөрдүлэр (ВИДЕО)
Аҕыйах хонуктааҕыта Хаҥалас улууһуттан Күөрдэмнээҕи норуодунай тыйаатыр кэлэктиибэ Былатыан Ойуунускай аатынан Саха драматическай тыйаатырын сценатыгар “Күөртээх Күөрдэм” диэн дьүһүйүүнү туруоран, көрөөччү биһирэбилин ылыан ылла.
Роман Попов, “Саха сирэ” хаһыат, edersaas.ru
Дэгиттэр дьоҕурдаах Прокопий Ноговицын 2008 сыллаахха “Ньургун Боотур” олоҥхоҕо олоҕуран суруйбут либреттотын сүнньүнэн оҥоһуллубут дьүһүйүүнү Үүнэр көлүөнэ тыйаатырын режиссера Александр Титигиров силигин ситэрэн-хоторон биэрдэ.
Нэһилиэктэрин удьуор харылы уустарыгар анаммыт туруорууга күөрдэмнэр (нэһилиэк баһылыга Андрей Варламов, Култуура дьиэтин дириэктэрэ Александра Иванова) киин куорат тыйаатырдарын айар үлэһиттэрин түмэ тардары ситистилэр.
Ол курдук, муусуканан киэргэтиитигэр Олоҥхо тыйаатырын дириэктэрэ Виталий Власов “Уус” композицията туһанылынна, декорацияны Олоҥхо тыйаатырын худуоһунньуга Михаил Егоров таҥан оҥордо. Дьөппөннөр аар-саарга аатырбыт, номох буолбут тимир уустарын туһунан дьүһүйүү Сергей Зверев аатынан Үҥкүү тыйаатырын саха национальнай инструменнарын оркестрын доҕуһуолунан барда, дирижер – Николай Петров. Ааптар аатыттан тиэкси Саха Өрөспүүбүлүкэтин норуодунай артыыһа Герасим Васильев аахта. Консультанынан удьуор тимир ууһа, норуот маастара Александр Данилов үлэлээтэ. Сүрүн оруоллары Күөрдэмнээҕи норуодунай тыйаатыр артыыстара (уус-уран салайааччы Февронья Ефремова) толордулар, дьүһүйүүгэ 50-тан тахса нэһилиэк эдэр-эмэн олохтооҕо кыттыыны ылла.
“Күөртээх Күөрдэм” дьүһүйүү биир уратытынан драматургияҕа саха тимир уустарын туһунан тиэмэни арыйара буолар. Манна чочу тыаһа аан бастаан бэйэтэ туспа хатыламмат муусука буолан лыҥкыныы оонньоон кутулунна.
Бу испэктээк Хаҥалас улууһун II Дьөппөн нэһилиэгэ төрүттэммитэ 250 сылыгар ананар.
Роман Попов, “Саха сирэ” хаһыат, edersaas.ru