«Манчаары оонньуулара» саха национальнай көрүҥнэрин тарҕатар, сайыннарар, ыччат успуордунан дьарыктанарын көҕүлүүр, чөл олохтоох буоларын мэктиэлиир түөрт сылга биирдэ ыытыллар күрэхтэһии. Санатар буоллахха, спартакиада аан бастаан 1968 сыллаахха буолбута.
СӨ Успуорт министиэристибэтин дааннайдарынан, быйыл спартакиада 11 көрүҥэр 7000-тан тахса спортсмен кыттара күүтүллэр.
Хаҥалас улууһун физическэй култуураҕа уонна успуорка управлениетын салайар Юрий Никифоров иһитиннэрбитинэн, улуус сүүмэрдэммит хамаандата спартакиада бары көрүҥэр кыттыаҕа. Тириэньэрдэр уонна кыттааччылар экипировкаларыгар,«Adidas» фирма спортивнай көстүүмнэригэр уонна бейсболкаларыгар Хаҥалас улууһун бэлиэтэ сыһыарыллыаҕа.
— Хаҥалас улууһуттан барыта 70 киһи буолан кытта барабыт, ол иһигэр 60 спортсмен уонна 10 тириэньэр. Коронавирус пандемията быйылгы «Манчаары оонньууларын» балаһыанньатыгар уларытыылары киллэрдэ. Ол курдук, хас биирдии кыттааччы спортсмен хайаан даҕаны коронавирус дьаҥын утары быһыыны ылбыт буолуохтаах. Ону таһынан кыттар хамаандалар оройуоннарынан уонна нэһилиэннэлэрин ахсаанынан түөрт бөлөххө арахсан күрэхтэһиэхтэрэ.
Биһиги улууспут бастакы бөлөххө киирдэ. Онон Алдан, Бүлүү, Ленскэй, Мэҥэ Хаҥалас, Мииринэй, Нерюнгри, Ньурба оройуоннарын уонна Дьокуускай куорат, ону тэҥэ ХИФУ хамаандаларын кытары күрэхтэһиэхпит, — диэтэ Юрий Никифоров.