«Саха сирин ийэлэрин Албан аата» экспозиционнай саалаҕа ийэлэр хорсун быһыыларыгар анаммыт истиэндэ болҕомтону тардыаҕа.
Бу Аҕа дойду уоттаах сэриитигэр Улуу Кыайыы 75 сылынан ыытыллыбыт «Ийэ өлбөт үйэлээх хорсун быһыыта» диэн көрдүүр-чинчийэр бырайыак түмүгүнэн оҥоһуллунна. Бырайыак сыала-соруга: Аҕа дойду уоттаах сэриитигэр оҕолорун сүтэрбит ийэлэри буларга, кинилэр олохторун, дьылҕаларын туһунан кэпсиир архыып докумуоннарын, хаартыскалары, видеолары түмэргэ туһаайыллыбыт.
Хаҥалас улууһа бу бырайыакка кыттан, уоттаах сэриигэ оҕолорун атаарбыт 255 ийэни чопчулаабытын туһунан улуустааҕы дьаһалта пресс-киинэ иһитиннэрэр. Ол курдук, көрдүүр-чинчийэр үлэнэн икки ийэ: Анисия Михайловна Соловьева уонна Софья Николаевна Петрова алталыы, икки ийэ биэстии, биэс ийэ түөртүү, 12 ийэ үстүү, 42 ийэ иккилии, 192 ийэ биирдии оҕолорун уоттаах сэрии толоонугар атаарбыттара суруллубут.
«Бырайыагы тэрийээччилэргэ уонна ирдиир-чинчийэр үлэҕэ түбүгүрбүт улууспут оробуочай бөлөҕөр улахан махтал. Кинилэр оҕолорун сэриигэ сүтэрбит күндү ийэлэр ааттарын үйэтитэргэ туох баар кыһамньыларын, болҕомтолорун ууран үлэлээтилэр. Маннык хабааннаах үлэ улууспутугар тиһиктээхтик салҕаныаҕар эрэлим улахан. Ийэлэр барахсаттар өлбөт үйэлээх хорсун быһыылара хаһан да умнуллуо суохтаах«, — диэбит улуус баһылыгын солбуйааччы Олег Иринеев.
Бырайыакка кыттыбыт алта оройуоҥҥа оробуочай бөлөхтөр тэриллэннэр, кылаас чаастарын, викториналары, куонкурустары, кэнсиэртэри, көрсүһүүлэри, оскуолаларга, бибилэтиэкэлэргэ тиһиктээхтик тэрийбиттэр. Хаҥалас улууһугар тэриллибит оробуочай бөлөххө 286 киһи кыттыбытыттан, 120 — оскуола үөрэнээччитэ, 82 киһи «Арассыыйа ийэлэрэ» уопсастыбаннай тэрилтэ Саха сиринээҕи салаатын чилиэннэрэ, 75 волонтер.
«Саха сирин ийэлэрин Албан аата» саала коронавирус дьаҥа аастаҕына арыллан, истиэндэни көрөргө бар дьонун ыҥырыа.