Хаҥаластар харахтарын эппэрээссийэлэттилэр

Бөлөххө киир:

Өрөспүүбүлүкэтээҕи офтальмологическай балыыһа уонна Хаҥалас улууһун киин балыыһата бииргэ үлэлэһиилэрин түмүгэр, тохсунньу 26 күнүгэр 22 кырдьаҕас киһи катарактатын эппэрээссийэлэттэ. Бу курдук үлэлэһии улуус олохтоохторугар, кыһалҕалаах дьоҥҥо олус табыгастаах, абыраллаах эбит.

Покровскай уонна Мохсоҕоллоох олохтоохторун Дьокуускайга харах балыыһатыгар тиэйэн киллэрдилэр. Балыыһаҕа кинилэри туспа көрүдүөрүнэн киллэрэн, туспа хоско киллэрэн, атын дьону кытары алтыспаттарын курдук тэрийдилэр. ИХА-тест туттаран, “ковидынан” ыалдьыбаттара биллибитин эрэ кэннэ, быраастарга киллэрдилэр.

Катаракта сааһырбыт дьону буулаан, ыйы-ыйынан, сылы-сылынан сордуур-муҥнуур. Оттон эппэрээссийэ 10 мүнүүтэ эрэ устата буолар, харахтан сыыһы ылбыт курдук, ааһан хаалар, мөлтөхтүк көрөр дьон үчүгэйдик көрөр буолан хаалаллар. Бу дьол буолбатах дуо?

Мин олохпор бу саамай түргэн, ыарыыта суох эппэрээссийэ буолла. 10 эрэ мүнүүтэлээх эппэрээссийэ эбит. Тугум да ыалдьыбат буолан хаалбыта сөхтөрөр. Тута дьиэҕэ барыахха сөп. Быраастарга махталым муҥура суох! — диэн Хаҥаластааҕы кырдьаҕастар, инбэлииттэр интэринээт-дьиэлэрин олохтооҕо Нина Владимировна үөрүүтүн үллэстэр.

Саҥа сылбын саҥа харахтаах көрсөбүн. Онон үөрүүм улахан. Катаракта сааһырбыт дьону буулуур диэни истэрим, 76 сааспар диэри миигин тумунна дии саныыр этим. Ол эрэн, эппэрээссийэ бэрт түргэнник, этэҥҥэ ааста. Баара-суоҕа 5 мүнүүтэ иһигэр эргэрбит хрусталикпын ылан баран, искусственнай хрусталигы уктулар. Сотору кэминэн эдэр эрдэҕинээҕим курдук үчүгэйдик көрөр буолуом, — диэн Покровскай олохтооҕо Анна Трофимова этэр.

Хаҥалас олхтоохторугар эппэрээссийэ, чинчийии барыта ОМС суотугар босхо буолла. Кэлбит массыыналара дьиэлэригэр илдьэн биэрдэ. Онон аҕыйах мүнүүтэ иһигэр ыарыыларын кытары быраһаайдаһан, көрөлллөрө тупсубут дьон үөрэн-көтөн, махтанан бардылар.

Былырыын харах балыыһатыгар 53 мөлүйүөн солкуобай суумалаах анал тэрил кэлбитэ. Материальнай-техническэй база бөҕөргөөбүтүн түмүгэр, хас биирдии хирургу күҥҥэ уончалыы эппэрээссийэни оҥорор кыахтаммыта.

Санатар буоллахха, пандемия кэмигэр офтальмологическай балыыһаҕа поликлиникаттан “направление” ылбакка да эрэ кэлэн, көрдөрүнүөххэ сөп. Аан бастаан (84112)500-707 төлөпүөнүнэн эрийэн, суруйтаран эрэ баран, тиийэҕит. Мааскалаах, бэрчээккилээх кэлии ирдэнэр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0