Ааспыт өрөбүлгэ Хаҥалас улууһугар массыынанан ыаһын оператордарын улуустааҕы күрэхтэһиитэ буолан ааста.
Күрэхтэһии өрөспүүбүлүкэ чулуу ыанньыксыта, норуот хаһаайыстыбатын үтүөлээх үлэһитэ, икки Үлэ Кыһыл Знамятын уонна Өктөөп өрөбөлүүссүйэтин уордьаннарын кавалера, Хаҥалас улууһун уонна I Малдьаҕар нэһилиэгин бочуоттаах олохтооҕо, тыыл уонна үлэ бэтэрээнэ Гаврил Романович Чепалов сырдык аатыгар ананна.
Түөрт хамаанда күөн көрүстэ — «Львова А.Е.» бааһынай хаһаайыстыбата (I Малдьаҕар нэһилиэгэ), «Туймаада экопиэрмэ» ХЭТ (Нөмүгү нэһилиэгэ), «Бөртө сылгы собуота» ХЭТ (II Малдьаҕар нэһилиэгэ) уонна «Хахсык» кэпэрэтиип (Төхтүр нэһилиэгэ).
Ыанньыксыттар теорияны билиигэ уонна ынаҕы массыынанан ыаһын сатабылларыгар тургутустулар. Ыыр аппарааты бириэмэҕэ ыһан-хомуйан көрдөрдүлэр уонна ынахтары ыатылар. Ону барытын исписэлиистэртэн тэриллибит дьүүллүүр сүбэ кытаанахтык хонтуруоллаан, баалларынан сыаналаата.
Түмүккэ бастакы миэстэни 200,32 бааллаах «Львова А.Е.» бааһынай хаһаайыстыбатын хамаандата (Саргылаана Иванова, Виктория Лыткина), иккис миэстэни 199,32 баалы хомуйбут «Бөртө сылгы собуотун» хамаандата (Марина Татаринова, Саргылаана Филиппова), үһүс бириистэх миэстэни 194,02 бааллаах «Хаксык» хамаандата (Агафья Шадрина, Октябрина Третьякова) ыллылар.
Биирдиилээн зачекка кыайыылааҕынан Мария Саввина («Туймаада экопиэрмэ» ыанньыксыта) буолла, иккис миэстэҕэ Саргылаана Филиппова («Бөртө сылгы собуота» ХЭТ), үһүс миэстэҕэ Саргылаана Иванова («Львова А.Е.» бааһынай хаһаайыстыбата) таҕыстылар.
Массыынанан ыаһын оператордарын өрөспүүбүлүкэтээҕи күрэхтэһиилэрэ икки сылга биирдэ ыытыллар. Маннык түһүлгэлэргэ идэҕэ бастыҥнар быһаарыллалларын таһынан, уопуту атастаһыы, саҥа технологиялары билиһиннэрии тэриллэр. Билигин пандемиянан сибээстээн күрэхтэһиилэр улуустарынан чөкө ыытыллаллар итиэннэ олор түмүктэринэн Тыа хаһаайыстыбатын министиэристибэтин анал хамыыһыйата өрөспүүбүлүкэ таһымнаах кыайыылааҕы быһаарыаҕа. Куонкурус кыайыылааҕа Бүтүн Арассыыйатааҕы массыынанан ыаһын оператордарын күрэхтэһиилэригэр Саха сирин чиэһин көмүскүүр быраабы ылыаҕа диэн министиэристибэ пресс-киинэ иһитиннэрэр.
Раиса Сибирякова, «Саха сирэ» edersaas.ru