Хаҥаластан Валерия Олесова атах оонньуутугар кыргыттарга муҥутуур кыайыылааҕынан буолла

«Манчаары оонньууларын» атах оонньууларыгар үс көрүҥүн (кылыы, ыстаҥа, куобах) түмүгүнэн Хаҥаластан сылдьар 18 саастаах Валерия Олесова муҥутуур кыайыылаах буолары ситистэ.

Валерия кылыы, ыстаҥа түмүктэринэн лиидэрдээн испитэ. Бүгүн куобахха 18 м 38 см ыстанан, эмиэ тэҥнээҕин булбата.

Бу көрүҥҥэ иккис миэстэни 17 м 65 см ойон, Мииринэйтэн Юна Маркова ылла. Оттон үһүс 16 м 96 см көрдөрүүлээх Бүлүүттэн Сайаана-Куо Комарова таҕыста.

Атах оонньууларын  үс көрүҥүн түмүгүнэн муҥутуур кыайыылааҕынан Валерия Олесова эрэллээхтик таҕыста.

— «Манчаары оонньууларыгар» кыайыыбын ийэбэр Анастасия Гаврильевнаҕа уонна эбэбэр Зоя Петровнаҕа аныыбын. Ийэм бүгүн төрөөбүт күнэ, онон икки бүк үөрүүлээх күн буолла, — диэн Валерия санаатын эттэ.

Кини атах оонньууларынан дьарыктаммыта икки сыл буолбут. Хаҥалас улууһун Хачыкаатыттан сылдьар, Дьокуускайдааҕы педколеджка үөрэнэр, Максим Оегостуровка махтанар.