Өрөспүүбүлүкэҕэ тэриллибит обсерватордартан биирдэстэрэ Хаҥалас улууһун Чапаево сэлиэнньэтигэр баар.
edersaas.ru
Обсерватор үлэтин туһунан Хаҥалас улууһун оройуоннааҕы киин балыыһатын кылаабынай бырааһа Ньургун Степанов кэпсээтэ:
— Улуус киин балыыһаларыгар көмүскэнии, дьаҥтан харыстаныы үс хайысхата баар буолуохтаах: бастакыта – нэһилиэнньэ “самоизоляцияҕа” барыыта, иккиһэ – обсерватор, үсүһэ – сыстыганнаах ыарыылар отделениелара.Чапаево сэлиэнньэтигэр обсерваторы биһиги ааспыт сэрэдэҕэ аспыппыт. Манна 26 киһи – Дьокуускай куорат 2 №-дээх балыыһатын үлэһиттэрэ уонна биир Покровскай киһитэ (кини бу балыыһаҕа эмтэммитэ) бааллар. Биһиги обсерваторбыт Дьокуускай куорат уонна атын оройуоннар обсерватордарыттан уратылаах. Оройуоннааҕы обсерватордартан уратыбыт диэн, биһиги хантаактаспыт дьону кытары үлэлиибит. Мэдиссиинискэй үлэһиттэрбит куруук обсерваторга бааллар, кинилэргэ манна олорор усулубуйа тэрилиннэ. Обсерваторга доруобай дьон сыталлар, оттон ыарыы кыра сибикитэ билиннэ даҕаны, кинилэри сысгыганнаах ыарыылар отделениеларыгар ыытабыт.
Оройуон дьаһалтата олус үчүгэйдик көмөлөһөр, биһиэхэ аан бастаан ыарыыттан көмүскүүр көстүүмнэрбит аҕыйахтар этэ. Ону оройуон 300 тыһыынча суумаҕа сүүс омук көстүүмүн атыыласта. Билигин Мохсоҕоллоох бөһүөлэгэр “ковидтаах” ыарыһахтары көрсөргө сыстыганнаах ыарыылар отделениеларын бэлэмниибит. Бу туспа дьиэ. Тыҥа искусственнай вентиляциятын (ИВЛ) аппараата, рентген-аппараат бааллар. Наада буоллаҕына, суһал терапия балаататын аһар кыахтаахпыт. Сыстыганнаах ыарыылар отделениеларыгар өрөмүөн ыытыллан бүтэн эрэр, оройуон баһылыга урбаанньыттары сыһыарда.
Биһиги Доруобуйа харыстабылын министиэристибэтин суһал штабын кытары сибээстэһэ олоробут. Боппуруостарбытын суһаллык быһаараллар. Бу күннэргэ биир дойдулаахтарбыт көмөлөрүн олус биллибит, Арсен Томскай уонна “Индрайвер” хампаанньа икки ИВЛ аппарааты атыылаһарбытыгар үп биэрдилэр, “Розтор” хампаанньа олоххо-дьаһахха наадалаах күннээҕи табаардары, Дьокуускайааҕы ыҥырыаны тутар киин ыҥырыа мүөтүттэн оҥоһуллубут бородуукталары аҕаллылар.
“Саха сирэ” хаһыат, edersaas.ru саайтка анаан Зоя ИГНАТЬЕВА