Ааспыт өрөбүлгэ Хаҥалас улууһугар үлэ дьонугар анаммыт бэрт сонун тэрээһин буолан ааста.
Булгунньахтаах бөһүөлэгэр «Тимир көлө» диэн күрэхтэһиигэ тырахтарыыстар сатабылларын тургутустулар. Күрэхтэһии биэс түһүмэҕинэн ыытылынна. Бастакы түһүмэхтэргэ кыттааччылар тыраахтар мэхэньиисимин итиэннэ сэрэхтээх буолуу быраабыларын төһө билэллэрин көрдөрөн, ыйытыктарга хоруйдаатылар.
Салгыы погрузчиктаах тыраахтары салайыыга, бэрэбинэни чууркаҕа уурууга, тыраахтары ”змейканан” салайыыга итиэннэ хаардаах сыһыынан ыытыыга күөн көрүстүлэр. Бэрт эрийсиилээх киирсии түмүгүнэн, “Бастыҥ тырахтарыыс” аатын Булгунньахтаахтан бааһынай хаһаайыстыба баһылыга Валерий Гаврильев ылан, сүрүн бирииһи — 50 тыһ. солк. тутта. Иккис миэстэни Тиит Эбэ мэхэньисээтэрэ Владимир Кириллин ылан, 20 тыһ. солк наҕараадаланна. Үһүс буолбут Леонид Наумов (Булгунньахтаах) 10 тыһ. солк. бирииһинэн бэлиэтэннэ.
Тыа хаһаайыстыбатын улуустааҕы управлениетын начальнига Вячеслав Владимиров куонкурус улууска Үлэ уонна дьарыктаах буолуу үс сылын чэрчитинэн, оробуочай идэни өрө тутар, ыччаты үлэҕэ сыһыарар, бастыҥ уопуту тарҕатар сыаллаах тэрилиннэ, кэлэр өттүгэр өссө кэҥэтэн, элбэх нэһилиэги хабан ыытыахпыт диэтэ.
Раиса Сибирякова, «Саха сирэ» хаһыат, edersaas.ru
