Хаҥалас улууһун Өктөм лицейин салалтата иһитиннэрбитинэн, ахсынньы 7 күнүгэр лицей-интэринээт 5 иитиллээччитэ утуйан туран баран, доруобуйата мөлтөөбүтүн туһунан иһитиннэрбит.
Интэринээт исписэлиистэрэ оҕолору барыларын бэрэбиэркэлээн, бары хотуолуулларын, убаҕаһынан ыыталларын, кыраадыстара 37 тиийбитин быһаарбыттар.
Эбиэт кэнниттэн 14.00 ч. 17 оҕо доруобуйата туруга мөлтөөбүтүн туһунан эппит. Салалта тута төрөппүттэригэр биллэрбит. Дириэктэр ыҥырыытынан Роспотребнадзор улуустааҕы отделын быраастара оҕолору уонна үлэһиттэри бэрэбиэркэлээбиттэр, анаалыс ылбыттар.
Билигин оҕолор Хаҥалас улууһун киин балыыһатын сыстыганнаах ыарыыларга отделениетыгар эмтэнэллэр. Кинилэргэ «острый гастроэнтерит» диэн диагноз туруорулунна. Бүгүҥҥү чахчыларынан, оҕолор ыарахан кэми аһардылар.
Балаһыанньа хайдаҕын билээри СӨ Доруобуйа харыстабылын кылаабынай педиатра Марфа Бурцева уонна кылаабынай эпидемиолога Дарьия Адамова улуустааҕы балыыһаҕа бардылар.
СӨ борокоротуурата иһитиннэрбитинэн, билигин тустаах исписэлиистэр үөрэнээччилэр аһылыктарын харайыы уонна туһаныы усулуобуйатын бэрэбиэркэлиэхтэрэ.
Надежда ЕГОРОВА