Биэс нэһилиэккэ үлэ тигинэччи салҕанар диэн иһитиннэрэллэр.
«Тыа сирин кэлим сайыннарыы» бырагыраама чэрчитинэн нэһилиэги тупсарыы үлэтэ дьон-сэргэ сүргэтин улаханнык көтөхпүт. Успуорт, оҕо былаһааккалара, дьон-сэргэ кэлэр-барар, хаамар суолун, сынньанар сирин тупсарыы, уот-күөс тиһигин уларытыы, о.д.а. үлэлэрэ элбэх. Бу туһунан улуустааҕы дьаһалта пресс-киинэ сиһилии сырдатар.
Улуус баһылыга Олег Иринеев тыа сирин нэһилиэктэрин тупсарыы, дьон олороругар табыгастаах усулуобуйаны тэрийии салалта үлэтигэр турар сүрүн соруктартан биирдэстэрэ буоларын бэлиэтээбит.
Ол курдук, 1 Дьөппөн нэһилиэгэр (Хоточчу) адаптивнай физкултууранан уонна успуорт көрүҥнэринэн дьарыктанарга былаһааккалары тупсарыы үлэлэрэ салҕаналлар. Нэһилиэк баһылыга Дмитрий Варламов бэдэрээччиттэр үлэспит матырыйаалларын уонна успуорт малын-салын күүтэллэрин, былаһаакка сыл бүтүүтэ ситэн-хотон туттарыллыахтааҕын бэлиэтээбит.
Оттон Өктөмҥө «Учительскай» пааркаҕа тротуар оҥоро, тимир күрүө туруора сылдьаллар диэн иһитиннэрэллэр. Бэлиэтээбиттэринэн, манна дьон-сэргэ астына, дуоһуйа сынньанар усулуобуйата толору тэриллиэхтээх. Кырасыабай ыскамыайкалары, тротуар хаймыытын (кытыытын), билиитэ ууруутун уонна уотун-күөһүн ситэрэллэр. Аныгыскы ыйы көрсө паарка үлэтэ үмүрүйүөхтээх дииллэр.
Улахан Ааҥҥа экопаарканы тупсараллар. Үлэ 90% толоруллубут. Экопаарканы бүтэрэн олоххо киллэрэллэригэр, нэһилиэнньэ харчынан өйөбүлэ, субуотунньуктар, матырыйааллар, тырааныспар сүрүн тирэх буолалларын тоһоҕолоон бэлиэтииллэр.
Булгунньахтаахха Улуу Кыайыы 75 сылынан Аҕа дойду улуу сэриитин кыттыылаахтарыгар анаан тутуллубут пааматынньыгы чөлүгэр түһэрии үлэтэ ыытылла турар. Бу ый бүтүүтэ үлэ түмүктэниэхтээҕин долгуйа күүтэллэрин этэллэр.
Хачыкаакка култуура уонна сынньалаҥ пааркатыгар, дьон хааман киирэригэр тротуар билиитэлэр ууруллубуттар, уота-күөһэ оҥоһуллубут, сахалыы истииллээх, кырасыабай көрүҥнээх аан туруоруллубут. Аллеяны Хачыкааттан төрүттээх худуоһунньуктар хартыыналара киэргэтэрэ олохтоохтор болҕомтолорун улаханнык тардыбыт.
«Тыа сирин тупсарыы үлэтэ оройуоммутугар биир улахан хамсааһынынан буолар. Маныаха дьаһалтаны кытары нэһилиэктэр кыттыһан, өйдөһөн уонна көмөлөөн үлэлээтэхтэринэ бу ситиһиллэр», — диэн баһылык Олег Иринеев сүргэтэ көтөҕүллэн, киэн туттан эппит.
Хаартыскалар улуус инфраструктуратын сайыннарар управлениеттан
+1
+1
+1
+1
+1
+1
+1