Хаҥаласка биисинэс сайдар кыахтанна дуо?
Хаҥалас улууһун Покровскай куоратыгар өрөспүүбүлүкэҕэ уон бэһис “Мин биисинэһим” өҥөнү оҥорор киин аһылынна. Киин “Дьоҕус уонна орто урбаан уонна биирдэм урбааны көҕүлээһинин өйөөһүн” национальнай бырайыагы олоххо киллэрии чэрчитинэн үлэҕэ киирдэ.
“Билигин Хаҥалас олохтоохторо “биир түннүк” бириинсибинэн судаарыстыбаннай , муниципальнай тэрилтэлэр уонна урбаан сайдыытын институттарын өҥөлөрүн ылар кыахтаахтар. Ону тэҥэ киини арыйыы оройуоҥҥа урбаанньыттар ахсааннарын элбэтиигэ көмөлөһүөҕэ”, — диэтэ “Хаҥаласка “Мин биисинэһим” киин бэрэстэбиитэлэ Варвара Иванова.
Үөрүүлээх сиэргэ-туомҥа Хаҥалас улууһун баһылыга Олег Иринеев, Урбаанньыттары сүрүннүүр сэбиэт бэрэссэдээтэлэ Екатерина Васильева, улуус экэнэмиичэскэй сайдыыга управлениетын начаалынньыга Раида Родионова, урбаанньыттар Юрий Яковлев, Александр Пудов кытыннылар. “Хамсык кэмигэр биисинэһи өйүүр наада. Дьоҕус уонна орто тэрилтэлэр ахсааннарыттан, кинилэр көдьүүстээх үлэлэриттэн оройуоммут экэниэмикэтэ туруктаах буолар”, — диэтэ оройуон баһылыга Олег Иринеев.
Киин үлэлиир аадырыһа: Покровскай к., Николаев уул., 4 дьиэ, Бэчээт дьиэтэ, 2-с этээс, “Мин биисинэһим” өҥөнү оҥорор киин офиһа.
Үлэлиир кэмэ: 09:00-тан 18:00 диэри (эбиэт 13:00-тан 14:00 диэри). Субуотаҕа уонна баскыһыаньаҕа – өрүүр күн. Төлөпүөн: 8(964) 419-21-51 (Варвара Афанасьевна Иванова)
“Хаҥалас улууһа” МТ пресс-киинэ
Бэлэмнээтэ Женни Стрюкова
Хаартыска: тустаах саайтан