Бэҕэһээ, кулун тутар 30 күнүгэр, Хаҥалас улууһун Төхтүрүгэр култуура үлэһиттэригэр анаан бэрт сэргэх тэрээһин ыытылынна. Төхтүрдээҕи А.И.Борисов аатынан «Эркээни» култуура киинигэр идэҕэ туһаайар коучинг буолан ааста.
Сонун тэрээһин туһунан биһиги саайтпыт уопсастыбаннай кэрэспэдьиэнэ Сэргэн Лэкээрин маннык иһитиннэрэр:
— Тэрээһиҥҥэ СӨ Норуот айымньытын уонна социальнай сайдыытын киинин, Хаҥаластааҕы култуура салалтатын, Хаҥаластааҕы норуот айымньытын уонна духуобунаһын киинин үлэһиттэрэ мустубут дьоҥҥо баай уопуттарын үллэһиннилэр. Маны сэргэ аныгы тэтимнээх үлэни-хамнаһы билиһиннэрэр сыаллаах Ньурба улууһун Чуукаардааҕы Е.М.Поликарпов аатынан «Эйгэ» норуот айымньытын уонна сынньалаҥ киинин уус-уран салайааччыта А.И. Сивцев ыалдьыттаата. Кини «Култуура үлэтигэр саҥа тэтим» диэн лиэксийэтинэн бэйэтин баай уопутун кэпсээн, хаҥаластар сэргээтилэр, интэриэһиргээтилэр.
Тэрээһини «Төхтүр» сынньалаҥ баазатыгар түмүктээтилэр. Култуура үлэһиттэрэ санааларын атастаһан, сонуну билэн-көрөн тарҕастылар. Онон сэргэх тэрээһини ыыппыт төхтүрдэргэ уонна оройуоннааҕы култуура салалтатын үлэһиттэригэр махтаналлар.
edersaas.ru
Хаартыскалары Сэргэн Лэкээрин тиксэрдэ.