Хаҥалас улууһун баһылыгын эбээһинэһин толорооччу Федор Борисов социальнай ситим нөҥүө биир дойдулаахтарын “самоизоляция” эрэсиимин тутуһарга ыҥырда.
«Покровскайга коронавирус дьаҥынан ыалдьыбыт киһи сыстыганнаах ыарыылары эмтиир улуустааҕы балыыһаҕа эмтэнэр. Бу улууска бастакы маннык диагнозтаах ыарыһах. Аймахтара долгуйбаккытыгар көрдөһөбүн. Улуус бары олохтоохторун “самоизоляция” эрэсиимин тутуһаргытыгар ыҥырабын. Оччоҕо эрэ бу дьаҥ тарҕамматын ситиһиэхпит».
Бүгүҥҥү күн туругунан, Хаҥалас улууһугар коронавирус дьаҥынан ыалдьыбыт биир ыарыһах баар. СӨ бырабыыталыстыбатын бэрэссэдээтэлин солбуйааччы Ольга Балабкина иһитиннэрбитинэн, ыарыһах алтыспыт дьоно быһаарыллаллар. Кинилэр анаалыс туттара сылдьаллар. Бу коронавирустаабыт киһи эмтэнэ сыппыт балыыһата дезинфекцияламмыт. Быраастар, санитарнай үлэһиттэр уонна олохтоох дьаһалта үлэтэ чуолкайдык уонна ситимнээхтик ыытыллаллар.
Ньургуйаана Иванова, “Саха сирэ” хаһыат, edersaas.ru
Хаартыска интэриниэттэн