Хаҥалас улууһугар элбэх кыбартыыралаах дьиэлэр акылааттарын бөҕөргөтүүгэ үлэ ыытыллар.
Саха сиригэр элбэх кыбартыыралаах дьиэлэргэ хапытаалынай өрөмүөнү оҥоруу эрэгийиэннээҕи бырагырааматынан, Покровскайга уонна Мохсоҕоллооххо аадырыстарынан үлэ ыытыллар. Акылааты бөҕөргөтөллөр, уот, уу, сылааһынан хааччыйар ситимнэри, кырыыһаны уларыталлар.
Покровскайга икки дьиэ: Орджоникидзе, 38 уонна Орджоникидзе, 18 акылааттарын бөҕөргөтүүгэ үлэ ыытылынна Управляющай хампаанньа бэрэстэбиитэлэ Вадим Лесь 1968 сыллаахха тутуллубут дьиэ хапытаалынай өрөмүөҥҥэ наадыйбыта ырааппытын этэр:
—Истиэнэтэ хайа баран, алдьанан, бэйэбит күүспүтүнэн хайдах кыалларынан өрөмүөннүүрбүт. Быйыл дьиэлэр болдьоҕунан хапытаалынай өрөмүөҥҥэ сөп түбэспиттэрэ үчүгэй. Үлэ хаачыстыбатыттан уонна түргэнник толорбуттарыттан астынныбыт. Маны сэргэ, уот ситимэ уларытылынна, билигин тас өттүн кырааскалыыллар, — диэн этэр кини. Иккис эбийиэккэ акылааты бөҕөргөтүү үлэтигэр илии баттаммыт.
«Оникс» ХЭУо генеральнай дириэктэрэ Афанасий Осипов этэринэн, дьиэ аннын бетоннааһын сииктэн, ууттан харыстыыр:
—Дьиэ аннын толору бетоннааһын, эбэтэр, сорох сиринэн бетону кутан оҥоруу бырайыактан тутулуктаах. Бу уу хааллаҕына онтон харыстыыр уонна өр кэмҥэ сулууспалыыр. Бетон былаһаакка уу сүүрэр сирин диэки анаан иҥнэри оҥоһуллар.
Мохсоҕоллооххо былырыыҥҥыттан 13 дьиэҕэ хапытаалынай өрөмүөн ыытыллыбыт. Быйыл аҕыс дьиэҕэ саҥа хантараак түһэрсиллибит.
—Хаҥалас улууһугар аукциоҥҥа кыайбыт үс бэдэрээттээх тэрилтэ, «Оникс», «Жемчужина», «Арктсрой» ХЭУо араас үлэҕэ үлэлииллэр. Билиҥҥи туругунан акылааты бөҕөргөтүүгэ, уот ситимин уларытыыга үлэлэр түмүктэнэн эрэллэр, таһын кырааскалыыллар. Олохтоохтор уонна управляющай хампаанньа сөбүлэҥинэн, дьиэ урукку бүрүөһүнүн ыраастаан баран, атын наадалаах үлэлэр ыытыллаллар. Сыбах, шпатлевка, грунтовка, ол кэнниттэн икки төгүллээн кыраасканан сотуу. Үлэ кыраапыгынын баран иһэр, болдьоммут кэмигэр бүтүөхтэрэ, — диэн иһитиннэрэр «СӨ элбэх кыбартыыралаах дьиэлэргэ хапытаалынай өрөмүөнү оҥорор пуонда» НКО генеральнай дириэктэрэ Владимир Ионин.
Санатан эттэххэ, Саха сирин олохтоохторо олорор дьиэлэрин хапытаалынай өрөмүөнүн туһунан иһитиннэриини: 8-914-270-06-86 (WhatsApp эбэтэр Telegram) билиэхтэрин сөп.