Хаҥаласка хаарбах дьиэттэн көһөрүү үлэтэ

Ааптар: Эдэр Саас

Бөлөххө киир:

Хаҥалас улууһугар 2019-2020 сылларга 3027,6 кв.м. иэннээх хаарбах туруктаах дьиэттэн дьону көһөртүүр былааннаахтар. Бу туһунан Хаҥалас улууһуттан иһитиннэрдилэр диэн СИА бэлиэтиир.

Билиҥҥи туругунан, Покровскай куоракка 21 кыбартыыраны ылбыттар, 63 982,4 тыһ. солк. хантараак түһэрсиллибит. Ону сэргэ, саҥа дьиэҕэ, 30 кыбартыыраҕа киириэхтээхтэр (тутааччы «Промстрой» ХЭУо).

Маны таһынан, Мохсоҕоллооххо иккис ырыынакка аҕыс кыбартыыра бэриллибит уонна 21 126,9 тыһ.солк. хантараак түһэрсиллибит. Хаарбах туруктаах икки кыбартыыра хаһаайыттара харчынан компенсацияны ылбыттар.

Хаарбах туруктаах дьиэттэн көһөрүү бырагырааматын кыттыылаахтара, көһөн киирбит кыбартыыралара тупсаҕайдарын бэлиэтээбиттэр.

«Тоҕус мэндиэмэннээх саҥа дьиэҕэ кыбартыыра күлүүһүн от ыйыгар туппуппут. Покровскай куорат уонна Өлүөнэ эбэ кытыла түннүктэн наһаа үчүгэйдик көстөллөр. Балкона киэҥин-куоҥун олус сөбүлээтибит. Барыта чөкө, сылаас», — диэн бырагыраама кыттыылааҕа санаатын үллэстибит.

«Бу бырагыраама олоххо киирбитэ наһаа үчүгэй, дьоҥҥо туһалаах. Кыбартыырабыт үчүгэйэ сүрдээх, хосторо киэҥнэр, сырдыктар. Түгэнинэн туһанан эттэххэ, бырагыраамаҕа киирбиппит кэнниттэн, биһигини кытары сибээһи наар тутан сылдьыбыттара, төлөпүөннүүллэр этэ уонна кэлэн көрөн-истэн бараллара, ыйытыыларбытыгар хоруйдууллара, сүбэ-ама биэрэллэрэ, — диир Покровскай олохтооҕо Тамара Леонова.

Хаҥалас улууһугар туруоруллубут бэрээдэгинэн, 2017 сыл тохсунньу 1 күнүгэр диэри, хаарбах туруктааҕынан уопсайа 30 618,6 кв.м. иэннээх 144 элбэх кыбартыыралаах, билигин 2037 киһи олорор дьиэлэрэ билиниллибиттэр:

Покровскай к. – 67 дьиэ, 452 кыбартыыра,

Мохсоҕоллоох б. – 3 дьиэ, 10 кыбартыыра,

Хачыкаат с. – 3 дьиэ, 32 кыбартыыра,

Өктөм с. – 52 дьиэ, 156 кыбартыыра,

Төхтүр с. – 12 дьиэ, 46 кыбартыыра,

Ой с. – 6 дьиэ, 15 кыбартыыра,

Сиинэ с. – 1 дьиэ, 12 кыбартыыра.

Гражданнары «2019-2025 сылларга гражданнары хаарбах туруктаах дьиэттэн көһөрүү» өрөспүүбүлүкэ бигэргэтиллибит бырагырааматыгар сөп түбэһиннэрэн, 2025 сыл балаҕан ыйын 1 күнүгэр диэри кэрдиистэринэн арааран көһөртүөхтэрэ.