Уопсастыба

Хаҥаласка дьиэ тутуута

Хаҥалас улууһугар эрэгийиэннээҕи аадырыстаах бырагырааманан элбэх кыбартыыралаах түөрт дьиэ тутуллар.

«Хаарбах дьиэттэн дьону көһөрүү бырагыраамата биир саамай сүрүнүнэн буолар. Бу улахан суолталаах хайысхаҕа үлэ улууспутугар көхтөөхтүк салҕанар«, — диир Хаҥалас улууһун баһылыга Олег Иринеев.
Бу үлэ чэрчитинэн, билиҥҥи туругунан аҥаардас Покровскайга элбэх кыбартыыралаах түөрт дьиэ тутулла турар. Бэлиэтээн эттэххэ, 2019 сылтан хаарбах туруктаах дьиэттэн көһөрүү иккис түһүмэҕэ ыытыллар.
24 кыбартыыралаах түөрт мэндиэмэннээх дьиэнни «Промстрой» Покровскайга Бырааттыы Ксенофонтовтар уулуссаларын 98 № -гэр тутар. Иһитиннэрэллэринэн, төрдүс  мэндиэмэн истиэнэтэ ууруллар. Үһүскэ хостор икки ардыларынааҕы быысаһыылары оҥороллор. Дьиэни 2021 сыл бүтүүтүгэр түмүктүүр былааннаахтар. Билиҥҥи туругунан тутуу 68 % бэлэм.
Маны сэргэ, бу сыл бүтүөр диэри эмиэ бу уулусса 27-гэр баар элбэх кыбартыыралаах дьиэни  киллэриэхтэрин баҕараллар. Бэдэрээччит «Хотустрой» ХЭУо. Биэс мэндиэмэннээх дьиэ 31 кыбартыыралаах. Бастакы мэндиэмэҥҥэ үлэлиир тэрилтэлэр киирэллэрэ былааннаммыт. Балаҕан ыйын 1 күнүгэр диэри тутааччылар дьиэ тас өртүн, түннүктэрин, болкуоннарын, муостатын, о.д.а. оҥорон бүтэриэхтээхтэр.  Тутуу  73 % бэлэм.
Бу уулусса 102 ньүөмэригэр 40 кыбартыыралаах дьиэ тутулла турар. Бэдэрээччитинэн «Промстрой» ХЭУо  буолар. Бу түөрт мэндиэмэннээх дьиэҕэ болкуона суох барыта биирдии хостоох 40 кыбартыыра баар буолар. Тутуу 65 % бэлэм. Эмиэ сыл бүтүүтүн диэки үлэҕэ киллэрэр былааннаахтар.
Онтон 2022 сыл бүтүүтүн диэки Комсомол уулуссатын 12 №-гэр 107 кыбартыыраҕа малааһын буолуоҕа диэн эрэннэрэллэр. Дьиэ атахтара түһэриллибиттэр, о.д.а. үлэлэр толоруллубуттар. Бэдэрээччит «ТСК +» ХЭУо.
Бэлиэтээн эттэххэ, хаарбах дьиэттэн дьону көһөрүү бырагыраама иитинэн, 2020 сыллаахха дьон-сэргэ 3027 кв. м иэннээх сиртэн итиччэ кээмэйдээххэ көспүт. Онтон 2020-2021 сс. улууска түһүмэхтэринэн 80 дьиэттэн (уопсай иэнэ 3190 кв.м.) дьону саҥа дьиэлэргэ көһөрөрү былаанныыллар.
0
0