Уопсастыба

Хаҥаласка бэс ыйын 15 күнүттэн лааҕырдар үлэлиэхтэрэ

Бэс ыйын 15 күнүттэн Хаҥалас улууһугар оскуолалар баазаларыгар 16 лааҕыр үлэтин саҕалыаҕа. Манна 1155 оҕо сылдьара былааннанар. Бу туһунан Хаҥалас улууһун үөрэҕин управлениетын сайыҥҥы сынньалаҥҥа исписэлииһэ Диана Федорова иһитиннэрдэ.

«Коронавирус пандемиятынан сибээстээн, сайыҥҥы үтүө күннэри билбэккэ аһардар буоллубут. Оттон үөрэнээччи сайыҥҥы сынньалаҥа оскуолатааҕы сыллар биир тутаах кэмнэрэ буолаллар. Онон, биһиги оройуоммутугар оҕо сайыҥҥы сынньалаҥа атын быһыылаахтык ыытыллыаҕа», — диэн Диана Федорова бэлиэтиир.

Хаҥалас улууһугар үс сезонунан 1345 оҕо сынньанара уонна агро-оскуола үлэлиирэ былааннанар. Билигин сынньалаҥы тэрийэр педагогтар састааптара бырагыраама бэлэмнии сылдьар. Оҕолорго анаан лиэксийэлэр, маастар-кылаастар, онлайн кэнсиэрдэр ыытыллыахтара. Маны таһынан, күҥҥэ 195 солкуобайга суоттаммыт «сухой паек» көрүллүөҕэ.

СИА.

0
0

Добавить комментарий