Хаҥалас ыччата кырдьаҕастар махталларын ылар.
Хачыкаакка уонна Тиит Эбэҕэ ыччаттар кырдьаҕастарыгар мэлдьи болҕомтолорун ууран көмөлөһөллөр, өйөбүл буолаллар. Бу нэһилиэктэргэ сыл ахсын баччаларга, муус ылан биэрэр үтүө үгэстээхтэр диэн УлуусМедиа иһитиннэрэр. Маны сэргэ, Тиит Эбэ ыччаттара үтүө санааланыы аахсыйатынан мууска наадыйар дьоҥҥо эмиэ ылаллар диэн бэлиэтиир.
—Былырыын 26-27 ыалга көмөлөспүт буоллахпытына, быйыл 19 ыалга муус ыллыбыт. Аахсыйаҕа нэһилиэкпит араас тэрилтэлэригэр үлэлиир ыччаттар кытталлар. Икки күн муус ыллыбыт. Мууска наадыйар ыалларбытыгар тыраахтар тиэйэн илдьэн биэрэригэр кэпсэппиппит. Бу сүрүннээн бэтэрээннэрбит, кырдьаҕастарбыт уонна соҕотох олорор дьон, дьахталлар буолаллар.
Биһиги волонтердааһынынан сылы эргиччи дьарыктанабыт. Бэтэрээннэрбитигэр саас хаар түһэрэбит, тиэргэннэрин иһин күрдьэн биэрэбит, өрө тардабыт, оһохторун оттоллоругар мас хайытабыт, о.д.а. кыһалҕаларынан көрөн көмөлөһөргө кыһаллабыт, — диэбит 1 Дьөппөн нэһилиэгэр ыччат бэлиитикэтин исписэлииһэ Василий Титов.
+1
+1
+1
+1
+1
+1
+1