Хаҥалас улууһун Тиит Арыы сэлиэнньэтин таһыгар итирик суоппар буруйунан киһи өлүүлээх суол быһылаана таҕыста.
СӨ ИДьМ-тын Госавтоинспекциятын управлениета иһитиннэрбитинэн, муус устар 11 күнүгэр, күнүс 15.30 мүн. саҕана, Хаҥалас улууһун полициятын дьуһуурунай чааһыгар иһитиннэрии киирбит. Тиит Арыы сэлиэнньэтин таһыгар «Умнас» кыһыҥҥы суолга массыыналар харсыһыыларын түмүгэр, дьон эмсэҕэлээбитин туһунан.
Барыллаан быһаарыынан, «УРАЛ» массыына утары суолга тахсан, «УАЗ 315195» массыыналыын харсыспыт. Бу таһаҕас тиэйэр массыына Дьокуускайтан Өлүөхүмэҕэ айаннаан испит.
Бу суол быһылаанын түмүгэр, «уазик» суоппара уонна аргыһа эчэйбиттэр. 44 саастаах олорсон испит аргыһа балыыһаҕа киирэн тыына быстыбыт…
Оттон «УРАЛ» 43 саастаах суоппара туох да эчэйиини ылбатах. Утары суолга тахсыбыт биричиинэтинэн уруулга арыгы иһэн баран олорбута буолбут — медицинскэй туоһулааһын 0,82 мг/л көрдөрбүт.
Маны таһынан, ГИБДД базатынан бэрэбиэркэлээбиттэрэ — бу суоппар 2012 сыллаахха массыынатын арыгы иһэн баран ыытан, административнай эппиэккэ тардылла сылдьыбыт.
Быһылаан матырыйааллара силиэстийэ уорганнарыгар бэриллибиттэр. Ол түмүгүнэн, холуобунай дьыала тэриллиэҕэ.
Госавтоинспекция көрдөһөр: өскөтүн уруулга арыгы иһэн баран олорбут киһини биитэр суолга эриллэҕэстик айанныыр массыынаны көрдөххүтүнэ, 02, 127 нүөмэрдэргэ, оттон улуустарга полиция отделларыгар эрийэн биллэриҥ! Биир эрийии дьон олоҕун быыһыан сөп!