Муус устар 7 күнүгэр Покровскай куоракка эдэр ыалларга дьиэ-уот сэртипикээтин үөрүүлээх быһыыга-майгыга туттардылар.
edersaas.ru
Барыта 17 эдэр ыал олорор дьиэни атыылаһарга эбэтэр чааһынай дьиэни туттарга уопсайа 12 мөлүйүөнтэн тахса суумаҕа социальнай төлөбүрү ылар бырааптааҕын туһунан сибидиэтэлистибэ хаһаайынанан буолла.
Санатан эттэххэ, судаарыстыба маннык өйөбүлэ «2020-2024 сылларга хаачыстыбалаах дьиэнэн хааччыйыы уонна дьиэ-уот, коммунальнай өҥөлөрүн хаачыстыбатын үрдэтии» СӨ бырагырааматын чэрчитинэн оҥоһуллар.
Покровскай куорат дьаһалтата иһитиннэрбитинэн, бу бырагыраама олоххо киллэриллэр кэмигэр улуус 208 эдэр ыала сибидиэтэлистибэ тутта.
Улуус баһылыга Олег Иринеев сэртипикээттэри туттарарыгар бырагыраамаҕа кыттар ыал ахсаана сыл аайы элбии турарын бэлиэтээтэ.
«Дьиэ-уот боппуруоһа ордук оҕолордоох эдэр ыалга сытыытык турар. Ол гынан баран, кинилэр бэйэ дьиэлэнэр туһунан баҕа санаалара «Эдэр ыалы олорор дьиэнэн хааччыйыы» бырагырааманан уонна муниципальнай тэриллии, оройуон бүддьүөттэриттэн хос үбүлээһин көмөлөрүнэн олоххо киирэр. Эһиэхэ барыгытыгар дьолу-соргуну, доруобуйаны уонна бары үчүгэйи баҕарабын», -– диэн улуус баһылыга эҕэрдэлээтэ.
Ону таһынан муниципальнай тэриллиилэр баһылыктарын ааттарыттан эдэр ыаллары Мохсоҕоллоох бөһүөлэгин баһылыга Александр Пермяков эҕэрдэлээтэ.
«Олус элбэх эдэр ыал саҥа дьиэлэниэн баҕарар, ол гынан баран оннук кыаҕа суох. Биһиги, эдэр ыаллар, маннык өйөбүлгүт иһин судаарыстыбаҕа уонна Хаҥалас улууһун салалтатыгар олус махтанабыт», -– диэн сэртипикээт туппут эдэр ыаллар ааттарыттан Александра Нархаева махталын биллэрдэ.
Надежда ЕГОРОВА, «Саха сирэ», edersaas.ru