Бу күннэргэ «Үлэ — олох суола. Албан Аат» диэн Хаҥалас улууһун Тумул нэһилиэгин дьонун олоххо ситиһиилэрин үйэтитэр дьоҕус ыйынньык-кинигэ күн сирин көрдө.
edersaas.ru
Дириҥ ис хоһоонноох кинигэ туһунан Хаҥаластан уопсастыбаннай кэрэспэдьиэн Маргарита Кузьмина бу курдук кэпсиир:
— Дьоҕурдаах үлэһит дьонноох: ыанньыксыт колхуостаахтан саҕалаан, учуонайга тиийэ норуот хаһаайыстыбатын араас салаатыгар үлэлээбит уонна билигин үлэлии сылдьар нэһилиэк киэн туттар дьоно ССРС, РФ, СӨ, улуус бочуоттаах ааттарыгар тиийэ сыаналаммыт тумуллар ааттара дьоһуннаах кинигэҕэ киирэн үйэтитилиннилэр. Кинигэҕэ барыта 129 киһи аата суруллан киирбит.
Аан тылы » Тумул нэһилиэгэ » МТ баһылыгынан үлэлээбит Родион Иванов, кинигэ ааптардарыттан биирдэстэрэ, Тумул нэһилиэгин бочуоттаах олохтооҕо Мария Семёнова суруйдулар. Кинигэ матырыйаалларын Мария Семёнова, Лидия Христофорова, Туйаара Галактионова хомуйан оҥорбуттар.
Ийэ дойдуга бэриниилээх буолуу сылыгар тахсыбыт кинигэ аныгы үйэ ыччата дойдутун устуоруйатын сэргииригэр, үөрэтэригэр, салгыырыгар, төрөөбүт Тумулун инники күөҥҥэ тутан, ааттата турарыгар туһуламмыт диэн олохтоохтор үөрэллэр.
Елена ПОТОЦКАЯ, «Саха сирэ» хаһыат, edersaas.ru