Бу күннэргэ Хаҥалас улууһун Тиит Арыы,Чкалов, Тумул нэһилиэктэригэр доруобуйаны бөҕөргөтөр өрөспүүбүлүкэтээҕи киинтэн эмчиттэр бөлөхтөрө Хаҥалас улууһугар үлэлээн кэллилэр.
edersaas.ru
Медицинскэй профилактика кииниттэн терапевт быраас Алёна Григорьева салайар эмчиттэрин бөлөҕөр невролог Мария Макарова, отоларинголог Алтана Прокопьева, офтальмолог Анжелика Спиридонова, УЗИ бырааһа Сардаана Алексеева үс нэһилиэгинэн 200-тэн тахса киһи доруобуйатын чинчийдилэр.
Быраастар көрүүлэрэ-истиилэрэ медицинскэй страхование чэрчитинэн буолан, олохтоохтор доруобуйаларын туругун босхо бэрэбиэркэлээтилэр.
Быраастары кытта ыкса сибээһи үс сыллааҕыта нэһилиэккэ дьахтар сэбиэтин бэрэссэдээтэлинэн үлэлээбит Маргарита Кузьмина олохтообута.
Билигин кини нэһилиэк бэрэстэбиитэллээх уорганын дьокутаата. Маргарита Владимировна эмчиттэр үлэлэрин туһунан бу курдук кэпсиир:
— Медицинэ профилактическай киинин кытта сибээс олохтуохпутуттан ыла, эмчиттэр быйыл үһүс төгүлүн дьоммут доруобуйаларын көрөн, бэрэбиэркэлээн бардылар. Биһиги холобурбутун батыһан, урукку дьахтар сэбиэтигэр бииргэ үлэлэспит ыаллыы нэһилиэктэртэн дьахталлар сэбиэттэрин салайааччылара: «Эмчиттэргин биһиэхэ ыыт», — диэн көрдөспүттэрин тиэрдибиппэр, хата, киин үлэһиттэрэ дьахтар-уопсастыбанньыктар этиилэрин быһа гыммакка, от ыйын ортотугар Төхтүр, Хачыкаат, 1-кы уонна 2-с Дьөппөн олохтоохторун көрө-истэ кэлиэхтэрэ.
Кыһамньылаах эмчиттэри көрсөн, олохтоон, дьону түмэргэ күүс-көмө буолбут Тиит Арыы нэһилиэгин учаастактааҕы балыыһатын кылаабынай бырааһыгар Варвара Лугиноваҕа, биэлсэр Татьяна Аммосоваҕа, олохтоох дьаһалта баһылыгар Григорий Лукиҥҥа, баһылык солбуйааччытыгар Любовь Индееваҕа, Чкаловтааҕы ФАП биэлсэрэ Елена Евстафьеваҕа, нэһилиэк олохтоохторугар истиҥ махталбын тиэрдэбин.
Ити курдук, дьахтар ылыстаҕына, барытын кыайар дииллэрин Маргарита Кузьмина холобура көрдөрөр. Билигин Доруобуйа харыстабылыгар туһуламмыт национальнай бырайыагы олоххо киллэрии кэмигэр дьахталлар сэбиэттэрэ олус оруоллааҕын СӨ Дьахталлар уопсастыбаннай сойууустарын бэрэссэдээтэлэ, РФ дьахталларын сойууһун Бюротун чилиэнэ Анжелика Андреева өрүү бэлиэтиир уонна дьахталлар бу үлэҕэ актыыбынай кыттыыны ылалларыгар ыҥырар.
Онон өрөспүүбүлүкэ улуустарыгар уонна нэһилиэктэригэр үлэлиир дьахталлар сэбиэттэрин салайааччылара Маргарита Кузьминаттан маннык үтүө дьыаланы хайдах саҕалаабытын ыйыталаһан, билсиэхтэрин сөп эбит.
Елена ПОТОЦКАЯ, «Саха сирэ» хаһыат, edersaas.ru
Хаартыска — Маргарита Кузьмина архыыбыттан.