Ааспыт өрөбүл күннэргэ Намҥа “Эҥсиэли хапсаҕайа” өрөспүүбүлүкэтээҕи турнир уонна Ил Түмэн дьокутаата, хапсаҕай федерациятын бэрэсидьиэнэ Николай Румянцев бирииһигэр муҥутуур кыайыылааҕы быһаарар түһүлгэ бэрт сэргэхтик ыытылынна. Хапсаҕай түһүлгэтигэр оҕолор, эр дьон уонна бэтэрээннэр бөлөхтөрүгэр барыта 17 ыйааһыҥҥа 295 спортсмен таҕыста.
Түһүлгэ бочуоттаах ыалдьыттарынан СӨ спорка миниистирин бастакы солбуйааччы Семен Чердонов, Үрдүкү спортивнай маастарыстыба оскуолатын дириэктэрэ Александр Игнатьев, кини бастакы солбуйааччыта Леонид Спиридонов, инвестиция миниистирэ Антон Сафронов, спорт үтүөлээх маастара Виктор Лебедев буоллулар.
Хапсыһыылар тыҥааһыннаахтык, сытыытык барбыттарын туоһутунан, Дыгын оонньуутун кыайыылааҕа Любомир Николаев, хапсаҕай биллиилээх маастардара Вадим Семенов, Николай Парников бириистээх миэстэҕэ тиксибэтэхтэрэ буолла.
Күрэхтэһии түмүгүнэн Егор Дмитриев, Айаал Охлопков, Айаал Лыткин – Саха Өрөспүүбүлүкэтин хапсаҕайга маастарын нуорматын толордулар. Оттон Иван Барашков, Вадим Данилов (иккиэн Уус Алдантан) уонна Сергей Каратаев (Кэбээйи) — “Сахаада” маастарын докумуонун туттулар. Эр дьоҥҥо ыйааһын аайы үс бастакы миэстэни ылбыттар “Киэргэ” фирма (генеральнай дириэктэр Александр Павлов) боруонсаттан кутуллан оҥоһуллубут сиэдэрэй оҥоһуулаах мэтээллэринэн наҕараадаламмыттарын бэлиэтиир тоҕоостоох.
Үгэс быһыытынан, сүрүн күрэхтэһии кэнниттэн муҥутуур кыайыылаахтары быһаарар түһүлгэ тэриллибитигэр, 70-ҥа диэри 19 бөҕөс кытынна. Онуоха бүтэһик быһаарыылаах киирсиигэ Игнат Андросов – Айхал Крылатовы (Үөһээ Бүлүү) охторон кылбар кыайыыны ситистэ. Оттон 70-тан үөһээ киилэлээхтэргэ 14 даадар суруйтарда. Түмүккэ олохтоохтор эрэллэрэ — Игорь Софронеев Евгений Алексеевы (Уус Алдан) хотон, кыайыы үөрүүтүн биллэ. Муҥутуур кыайыылаахтар Николай Румянцев илиититтэн 50-нии тыһ. солк. сертификаттары туттулар. Оттон Игорь Софронеев “Түһүлгэ бастыҥ бөҕөһүнэн” ааттанан, “Быйаҥ” хааччахтаммыт эппиэтинэстээх тэрилтэттэн (дириэктэр Р.Е.Окороков) убаһанан наҕараадаланна.
Ити туһунан биһиэхэ хапсаҕай түһүлгэлэрин солбуллубат комментатора, “Кэскил” хаһыат суруналыыһа Александр Васильев-Көрдүгэн иһитиннэрдэ.
Түһүлгэ түмүк көрдөрүүтэ
Уолаттарга:
50 кг (12 кыттааччы): 1. Михаил Бродников (ДЮСШ-3), 2. Иван Корнилов (Жатай), 3. Айтал Готовцев (Нам).
55 кг (19): 1. Александр Иванов, 2. Валерий Рожин (иккиэн Уус Алдан), 3. Василий Слепцов (Өймөкөөн).
62 кг (22): 1. Арылхан Парников (Нам), 2. Петр Степанов (Кэбээйи), 3. Сергей Максимов (Чурапчы).
70 кг (15): 1. Радомир Осипов (Уус Алдан), 2. Азамат Ющенко (Дьокуускай), 3. Албан Аввакумов (Таатта).
80 кг (7): 1. Данил Иванов (Хаҥалас), 2. Вани Гоголев (Үөһээ Бүлүү/Уус Алдан), 3. Егор Слепцов (Чурапчы).
+80 кг (10): 1. Никита Хабаров (Дьокуускай), 2. Эдуард Максимов (Горнай), 3. Петр Захаров (Чурапчы).
Эр дьоҥҥо:
55 кг (20): 1. Айаал Лыткин (Мэҥэ Хаҥалас), 2. Николай Винокуров (Нам), 3. Константин Эверстов (Уус Алдан).
62 кг (43): 1. Егор Дмитриев (Бүлүү/Дьокуускай), 2. Андрей Захаров (Бүлүү/Модун), 3. Илья Шишигин (Хаҥалас/Модун).
70 кг (39): 1. Айаал Охлопков (Нам), 2. Андрей Сивцев, 3. Анатолий Игнатьев (иккиэн Мэҥэ Хаҥалас).
80 кг (28): 1. Игорь Софронеев (Нам), 2. Константин Власов (Чурапчы), 3. Семен Кычкин (Мэҥэ Хаҥалас).
90 кг (18): 1. Платон Саввинов (Үөһээ Бүлүү/Модун), 2. Кузьма Сивцев, 3. Антон Тойтонов (иккиэн Намтан).
+90 кг (12): 1. Евгений Алексеев (Уус Алдан), 2. Дмитрий Рахлеев (Таатта), 3. Юрий Старостин (Дьааҥы/Модун).
Бэтэрээннэргэ:
60 кг (14): 1. Захар Дьячковскай (Мэҥэ Хаҥалас), 2. Семен Соркомов (Муома), 3. Дмитрий Монастырев (Чурапчы).
70 кг (13): 1. Алексей Варламов (Мэҥэ Хаҥалас), 2. Прокопий Трофимов (Алдан/Модун), 3. Василий Уйгуров (Дьокуускай).
80 кг (12): 1. Петр Брызгалов (Мэҥэ Хаҥалас), 2. Александр Андреев (Чурапчы), 3. Михаил Тихонов (Мэҥэ Хаҥалас).
90 кг (5): 1. Александр Румин (Нам), 2. Григорий Массаев (Таатта), 3. Станислав Афанасьев (Дьокуускай).
+90 кг (5): 1. Трофим Афанасьев (Ньурба), 2. Николай Филиппов (Амма), 3. Дмитрий Петров (Үөһээ Бүлүү).
Петр ПАВЛОВ, “Саха сирэ”, www.edersaas.ru
Хаартыскаҕа: Түһүлгэ бастыҥ бөҕөһө — Игорь Софронеев.
P.S. Аны бу өрөбүл күннэргэ, ол аата, олунньу 18-19 күннэригэр Чурапчыга “Чакыр таас хапсаҕайа”, Үөһээ Бүлүүгэ “Бычырдаан Бөҕө” уонна Кэбээйигэ Владимир Сметанин кэриэһигэр турнирдар ыытыллыахтара.