Тыа хаһаайыстыбатын министиэристибэтигэр муус устар 30 күнүгэр ыһыыга бэлэмнэнии боппуруоһугар анаан ыытыллыбыт сэлиэктэринэн сүбэ мунньахха сиргэ үлэлиир улуустар бары отчуоттаабыттара.
edersaas.ru.
Онно этиллибитинэн, хаһаайыстыбалар бурдук, сүөһү сиир култууратын уонна оҕуруот аһын сиэмэтинэн 90,5 % хааччыллыбыттар. Минеральнай уоҕурдууну уонна ыһыы сиэмэтин аҕалыыга эппиэттээх оператор хаһаайыстыбалар 3 тыһ. 985 туоннаны аҕалбыттар (былаан 4 тыһ. 401 т). Улуустар иһитиннэриилэрин кэнниттэн миниистири солбуйааччы Николай Афанасьев тирээн соруктары билиһиннэрдэ. Ол, бастатан туран, ыһыыны кэмин куоттарбакка, тэрээһиннээхтик итиэннэ агротехнология ирдэбиллэрин тутуһан туран ыытарга бэлэмнэнии буолар.
Сиртэн үүнээйини ылыыга, мелиорацияҕа, материальнай-тиэхиньиичэскэй хааччыйыыга итиэннэ тыа хаһаайыстыбатын информатизациялааһыҥҥа департаменын салайааччы Василий Чичигинаров иһитиннэрбитинэн, министиэристибэҕэ ыһыы сирин иэнин тутула оҥоһуллубут уонна быйылгы сыллаах производственнай былаан оҥоһуллубут. Быйыл ыһыы үлэтэ былырыыҥҥы курдук, 48,7 тыһ. гектар бааһынаҕа ыытыллыахтаах. Ол иһигэр, бурдук 10,3 тыһ. гектарга, сүөһү сиир култуурата 28,8 тыһ. гектарга ыһыллыахтаах, хортуоппуй 7,7 тыһ. гектарга, аһаҕас буорга үүнэр оҕуруот аһа 2 тыһ. гектарга олордуллуохтаах, 10 тыһ. гектар бааһына паарданыахтаах. Ыһыы үлэтин тэрийиигэ бүддьүөттэн 349,9 мөл. солкуобай көрүллэн, тустаахтарга тиэрдиллэ сылдьар.
Раиса Сибирякова, «Саха сирэ» edersaas.ru.