Хаһаайыстыбалар үүннэрбит хортуоппуйдарын, оҕуруоттарын аһын хаһаанар кыахтаннылар
![](https://edersaas.ru/wp-content/uploads/2018/04/Foto-ovoshhehranilishhe.jpg)
Өрөспүүбүлүкэ улуустарыгар хортуоппуйу уонна оҕуруот аһын уурар-харайар 81 тутуу баар. Балар холбоон 29820 туонна ас хаһааныллар истээхтэр. Ити иһигэр сэбиэскэй саҕанааҕыта ахсааннаах. Кэлин 2012 сылтан саҕалаан судаарыстыба өйөбүлүнэн тутуллубут эбийиэктэр баараҕайдар уонна тупсаҕай оҥоһуулаахтар. Барыта 19 эбийиэги тутууга 6 сыл устатыгар 341,8 мөл. солк. ороскуоттаммыт, ити иһигэр өрөспүүбүлүкэ бүддьүөтүттэн үбүлэниитэ – 241,3 мөл. солк.
Манна эбэн эттэххэ, тыа сирин олоҕун-дьаһаҕын сайыннарыыга туһуламмыт федеральнай бырагыраамаҕа биһиги өрөспүүбүлүкэбит кыттыгас үбүлээһин сүнньүнэн үгүөрү үбү угар буолан, 2010-2017 сс. 17 улуус 52 бөһүөлэгэр 431,335 км усталаах сайыҥҥы уу ситимэ тардылынна. Манна барыта холбоон 641 мөл. 454 тыһ. солк. суумалаах үп угулунна. Улахан ороскуоттаах курдук гынан баран, кылгас сайыннаах Саха сирин хаһаайыстыбалара, ыаллара уонунан сылларга хортуоппуйунан, оҕуруот аһынан хааччыналларын таһынан атыылаан дохуот киллэринэллэрин, сибэкки, мас олордон чэчирэтэллэрин ааҕыстахха, ороскуотун хас эмит бүк толуйуо турдаҕа.
Василий НИКИФОРОВ