Нам улууһа саас хортуоппуйу 530 гектарга, оттон аһаҕас буорга үүнэр оҕуруот аһын 126 гектарга олордубута.
Хомуур үгэнэ буолан, кууллаах хортуоппуйу, атын да оҕуруот аһын тиэммит массыыналары билигин киһи элбэҕи көрөр. Тыа хаһаайыстыбатын улуустааҕы управлениетын кылаабынай агронома Сардаана Новгородова этэринэн, үүнүү урукку өҥ дьылларга тиийбэтэр да, улуус баалабайынан хортуоппуйу 4 тыһ. 767 туоннаны, оттон хаппыыстаны, моркуобу уонна сүбүөкүлэни 1 тыһ 720 туоннаны хомуйарга былаанныыр.
Бааһынай хаһаайыстыбалар хортуоппуйу 399 гектарга олордубуттар. Бөтүҥ олохтоохторо Сивцев Михаил, Григорий Уваровскай курдук хаһаайыстыба тэринэн сиртэн үүнээйини ылыыга өр сыллартан идэтийэн үлэлиир дьону сэргэ эдэрдэр хото ылсыбыттара үөрдэр. Холобур, Хатыҥ Арыыга Захар Винокуров бэркэ үлэлии сылдьар. Үөдэй ыччата, аҕыйах сыллааҕыта үс гектар ыһыылаах Рафаэль Петров билигин уон биир гектарга үлэлиир. Кини биир дойдулааҕа Эдгар Константинов бааһынатын быйыл икки гектарынан кэҥэтэн, хортуоппуйун сүүрбэ икки гектарга ыспыт.
Хамаҕатта нэһилиэгин «Саҥа сүүрээн» бааһынай хаһаайыстыбата хомууру балаҕан ыйын 4 күнүттэн саҕалаабыт. Хортуоппуйу хомуйар хамбаайыннаах буолан, хомуур кэмигэр элбэх үлэһиккэ наадыйбат, арай, тиэйэр-таһар уонна суортуур үлэҕэ аҕыйах киһини наймылаһар эбит.
Кыһыл дьүһүннээх, Германияҕа оҥоһуллубут Grimme хамбаайыны холбоммут «Бөлөрүүс» тыраахтар бааһына устун дьоһуннана хаамар. Хамбаайын алларааҥҥы бааллара хастыы да кирээдэни баһа-баһа ыыталлара транспортёр устун айаннаан иһэн, сыыһа-буора аллара саккырыыр, оттон хортуоппуйдара бырысыапка кутуллаллар. Өр-өтөр буолбат, массыына бырысыаба туолан, бааһынаттан тахсар суолу тутар, хортуоппуйу кыһыҥҥы ыскылаакка аҕалан куурдар бункердарга кутар. Манна Екатерина Татаринова салалтатынан түөрт киһи хортуоппуйу наардыыллар, сороҕун сиэмэҕэ талан туспа уураллар, сороҕун сотору атыылыырга анаан кууллууллар.
— Барыта 25 гектарга хортуоппуй Розари суордун олордубуппут, – диэн кэпсиир хаһаайыстыба баһылыга Александр Жирков. – Сайын төрүт ардаабатаҕа, атырдьах ыйыгар эрэ түспүтэ. Сайын уу куттара сатаабыппыт да, син биир курааннаан, хортуоппуй төрүөҕэ олус аҕыйах. Гектартан 100 сэнтиниэр кэллэр ханнык.
«Саҥа сүүрээн» 400 туонна хортуоппуй киирэр ыскылаатын иллэрээ сыл туттубута. Аҥар өттө ситэрилиннэҕинэ, төһө баҕарар элбэх оҕуруот аһын харайар кыахтаныыһы. Мин бу кылгас сырыыбар хаһаайыстыба баһылыга илии ыарахан үлэтин тиэхиньикэ күүһүнэн солбуйарга дьулуһарын хайҕаатым, «сир үлэтигэр тиэхиньикэ туһаныллыахтаах» диирин бэркэ кэрэхсии иһиттим. Ийэтэ, Нам биир бастакы бааһынайа Ольга Жиркова, саҕалаабыт үлэтин дьоһуннук салгыы сылдьар эдэр киһи бааһынатын өссө кэҥэтиэҕин (тиэхиньикэтэ онно эппиэттэһэр) сир-уот боппуруоһа быһаарыллан испэтэ атахтыыр эбит.
Раиса Сибирякова, “Саха сирэ” хаһыат, edersaas.ru.
Улуус кылаабынай агронома Сардаана Новгородова (иккис кэккэҕэ хаҥастан иккис) Үөдэй эдэр бааһынайа Рафаэль Петров (иккис кэккэҕэ ортоку) бааһынатыгар хомуур хаамыытын билсэр.
Бөтүҥҥэ “Дьулус” бааһынай хаһаайыстыба үүнүүтэ быйыл да куһаҕана суох.
“Саҥа сүүрээн” бааһынай хаһаайыстыба салайааччыта Александр Жирков (уҥаттан бастакы) тырахтарыыс Владимир Быкановы кытары.
Хортуоппуйу суортааччылартан элбэх тутулуктаах.