Муус устар 28 күнүгэр тыа хаһаайыстыбатын миниистирин солбуйааччы Василий Афанасьев социальнай ситимҥэ тахсан, ыйытыыларга хоруйдаата.
Ыйытыы: Былырыын улахан баһаар туран, элбэх хаһаайыстыбалар отторо умайбыта. Кинилэргэ туох көмө оҥоһулунна?
— Бу кыстыкка 18 923 туонна оту атыылаһан тиэртибит. Суол алдьаныан иннинэ улуустарга тиэйдибит, билигин бу от барыта тиэрдиллэн турар. Бүддьүөттэн 31 мөлүйүөн солкуобайдаах үп көрүллүбүтэ.
Ыйытыы: “Хаһаайыстыбалар халааҥҥа бэлэмнэр дуо?”
— Халаан уута ылар сирдэригэр баар хаһаайыстыбалар бэлэм олороллор. Уу кэлэрэ чугаһаатаҕына, сүөһүнү, сылгыны үрдүк сиргэ үүрүөхтэрэ. Тыа хаһаайыстыбатын министиэристибэтин үлэһиттэрэ болҕомтолорун ордук Ленскэй, Өлүөхүмэ, Хаҥалас, Нам, Чурапчы, Амма, Уус Алдан улуустарыгар уураллар. Ону тэҥэ, халаан уутуттан эмсэҕэлээһин содулларын кылгас кэмҥэ туоратарга үлэлиэхпит. Бары улуустарга суһал ыстааптар тэрилиннилэр.
Ангелина Васильева, “Саха сирэ” хаһыат, edersaas.ru