Алтынньы 4 күнүгэр, sakhapress1 иһитиннэрбитинэн, Усуйаана Хаһаачыйатын олохтооҕор, Владимир Слепцовка үрүҥ эһэ саба түспүт.
Табаһыт «Лээхэп улахан арыытыгар» ыстаадатын көрө сылдьыбыт. Түүнүн хаастыыр эбит. Ол түүн эмиэ бултаан баран үүтээнигэр кэлбитэ, арай, дьиэтин таһа барыта ыһыллан хаалбыт. Дьиктиргээн көрө турдаҕына, эмискэ, икки оҕолоох үрүҥ эһэ үүтээнтэн ойон тахсыбыт да, табаһыкка саба түспүт. Ити кыл түгэҥҥэ, Владимир тимир буочуканы эһэҕэ бырахпыт да, кыыл онно кыһамматах. Бу кыыл кинини соһор, ытырар кэмигэр, кини нэһилиэккэ хаалбыт уолчаанын санаабыт. Хайаатар да үһүс кылааска үөрэнэр оҕотугар төннүөх буолан эрэннэрбитин өйдөөн, өлбүтэ буолан кубулуммут. Кыыл киһини өлбүт дии санаан, оҕолорун илдьэ барбыт. Төбөтүгэр, этигэр-сиинигэр эчэйиилэрдээх табаһыт суотабай сибээһинэн дьонугар биллэрбит. Дьоно тута суһал көмөнү ыҥыраннар, ол күн РФ Арктическай оройуон көмөнү оҥорор федеральнай сулууспатын пограничниктара МИ -8 бөртөлүөтүнэн көтөн кэлэн, табаһыты Тиксии оройуоннааҕы балыыһатыгар илдьибиттэр.
Ульяна Захарова