Гражданскай уопсастыба институтун сайдыытын миниистирэ Сардаана Гурьева оннугар ким олоруоҕай?
edersaas.ru
Интэриниэт ситимигэр миниистир кириэһилэтигэр билигин Ил Дархан уонна бырабыыталыстыба дьаһалтатыгар каадыр боппуруоһунан дьарыктанар Андрей Мартыновы олордон ырааттылар. Оттон Егор Борисов бу чааһыгар туох санаалааҕый? Бу туһунан кини бэҕэһээ блогердары кытары көрсүһүүтүгэр эттэ.
Санатан эттэххэ, бу күннэргэ миниистир Сардаана Гурьева РФ киһи быраабын көмүскүүр боломуочунайа Татьяна Москалькованы кытары көрсөн сөбүлэҥи ааспыта. Бүгүн кини кандидатуратын Ил Түмэн сис кэмитиэтигэр көрдүлэр. Сардаана Михайловнаны сэргэ Татьяна Москалькова Пермь кыраайыгар Павел Миков, Тула уобалаһыгар Татьяна Ларина, Магадаҥҥа Олег Михайлюк кандидатураларын сөбүлэҥин аһарда.
Егор Борисов бу дуоһунаска Ил Дархан мэктиэлээһининэн баралларын бэлиэтээн туран, Сардаана Михайловна сөбүлэҥи ааспытын эттэ. “Оттон саҥа миниистир ким буолуоҕун эппэппин, ыйаах таҕыстаҕына билиэххит”, —диэн этэр. Интэриниэт ситимигэр билигин каадыр боппуруоһунан дьарыктанар Андрей Мартынов буолуоҕун сөп диэн баара. Ол эрээри Егор Афанасьевич кини буолбатах диэн эттэ.
Ыспыраапка:
Гражданскай уопсастыба институтун сайдыытын министиэристибэтэ 2016 сыллаахха Уопсастыбаннай көҕүлээһин департаменын оннугар тэриллибитэ. Миниистиринэн Юстиция судаарыстыбаннай кэмитиэтин бэрэссэдээтэлинэн үлэлии олорбут Сардаана Гурьева анаммыта.
Аграфена КУЗЬМИНА, “Саха сирэ” хаһыат, edersaas.ru