Билигин ыччат тас дойдуга үөрэнэ, олохсуйа барарын туһунан үгүстүк истэбит. Ас арааһын, таҥас-сап эгэлгэтин, муораны түһэрэн Инстаграмҥа таһаараллар. Тыйыс айылҕалаах Саха сиригэр олорооччулар ымсыырарбыт кэмнээх буолуо дуо? Туох сыалтан төрөөбүт сирдэриттэн тэйэн кый ыраахха талаһалларый? Омук дьоно саха киһитин хайдах ылынарый? Ону билсээри Кытайга Гуанчжоу куоракка олорор (@lenadio_gz) Лена Диодоровалыын кэпсэттибит.
– Лена, хас сыллаахха Кытайга көспүккүнүй? Тоҕо Гуанчжоу куораты таллыҥ?
– Биһиги Кытайга 2011 сыл күһүнүгэр көспүппүт. Бастаан Пекиҥҥэ олорбуппут. Онтон Кытай соҕуруу өттүгэр олоруохпутун баҕаран уонна үлэбэр табыгастааҕынан сибээстээн Гуанчжоу куоракка кэлбиппит. Манна кыраныысса таһыгар табаары таһар дьоҕус тэрилтэлээхпин. Гуанчжоуга саамай элбэх оҥорон таһаарар собуоттар бааллар.
– Уон мөлүйүөнтэн тахса нэһилиэнньэлээх куоракка тыыныҥ-быарыҥ хаайтарбат дуо?
– Суох. Мин улахан куоракка олорорбун олус астынабын. Сөбүлүүбүн бу куорат дьоно-сэргэтэ элбэҕин, кэлии-барыы тэтимин, тыаһын-ууһун уонна элбэх үрдүк, кыраһыабай тутуулардааҕын. Бу диэн эттэххэ, оҕо эрдэхпинэ тас дойдуга олорору баҕа санаа оҥостубутум. Билигин олоҕум хас биирдии түгэниттэн дуоһуйабын.
— Киһи тас дойдуга көһөн тиийдэҕинэ бастаан ыарарҕатар. Холобур быһыытынан тугу сүбэлиэҥ этэй
— Оннук. Кыраныысса таһыгар көһөн кэлии – туспа тургутуу. Холобур, үөрэнэ эбэтэр киийииттээн барар буоллаххына, атын дойду тэтимигэр киирэр быдан судургу дии саныыбын. Оттон дьиэ-кэргэҥҥинээн көһөн кэлэр, биллэн турар, атын. Ол эрээри, баҕалаах баҕанаҕа ыттар, тургутууну тулуйар кыахтаах. Итинник түгэҥҥэ бэйэҕэр эрэллээх уонна чопчу сыаллаах буолуҥ.
– Сарсыҥҥы күҥҥэр төһө эрэллээххиний?
– Хомолтолоох соҕустук баҕар иһиллиэ эрээри, сарсыҥҥы күммэр олус эрэллээхпин дэнэр кыаҕым суох. Кэнники кэмҥэ барыта уларыйа турар, экэниэмикэбит доҕолоҥнуур. Атыы-тутуу улаханнык хамсаабат. Бэйэм билиҥҥи үлэбэр, дьарыкпар эрэлим улахан суох. Ол эрээри тус бэйэбэр эрэллээхпин.
– Кытай олус сайдыылаах дойду. Эн санааҕар бу этии оруннаах дуо?
– Кытай, кырдьык, олус сайдыылаах судаарыстыба. Сайдыыта олус киэҥ буоллаҕа. Бэйэм үлэлиир хайысхабынан этэр буоллахха, тиэйии-таһыы манна олус судургутуллубут. Талбыт малгын-салгын аан дойду хайа баҕарар муннугар, ханнык да бюрократическай мэһэйдэри көрсүбэккэ эрэ тиэрдиэххин сөп.
— Эн оҕоҕун сүрүннээн ханнык омук тылынан үөрэтэҕин?
– Билигин уолум 5 саастаах. Кини нууччалыы уонна кытайдыы олус ыраастык саҥарар. Ону таһынан английскайы, төрөөбүт сахабыт тылын эмиэ үөрэтэбит.
Ыспыраапка: Гуанчжоу — Кытай өрөспүүбүлүкэтин Гуандун провинциятын соҕуруу куората. Кытайга наука, култуура, экэниэмикэ, тиэхиньикэ сайдыытын киинэ. Шанхай уонна Пекин кэнниттэн улахан куораттар ахсааннарыгар киирэр. Нэһилиэнньэтэ 10 мөл. тахса.