Бүгүн Кыайыы 50 cыла диэн успуорт дыбарыаһыгар MuusuSTAR бэстибээл чэрчитинэн ГТО-ҕа хамаанданан күрэхтэһии буолла.
Уопсайа өрөспүүбүлүкэ араас муннуктарыттан 12 хамаанда кыттыыны ылла. Күүрээннээх күрэхтэһии түмүгүнэн Степан Федоров хамандыырдаах Бүлүү улууһун хамаандата бастакы миэстэни ылла. Иккис миэстэҕэ Чурапчы улууһун хамаандата, үһүс миэстэҕэ Уус Алдан улууһун хамаандата тигистэ.
Тэрээһин тула бүтүн Арассыыйатааҕы ГТО успуорт-комплекс эрэгийиэннээҕи салайааччыта Александр Васильевич Брызгалов санаатын үллэһиннэ:
— Маннык өрөспүүбүлүкэтээҕи тэрээһини аан бастаан ыыттыбыт. Бастакы холонууга бэркэ ааста. Уопсайа 12 хамаанда кыттыыны ылла. Онтон түөрдэ хоту улуустарыттан кэлбиттэр. Финалга алта хамаанда киирдэ. Таһыччы көрдөрүүлээх буолан, Бүлүү улууһун хамаандата бастаата. Кинилэртэн 18 сөкүүндэнэн хаалан Чурапчы улууһа иккис миэстэҕэ таҕыста. Үһүс Уус Алдан улууһа буолла. Бүгүн кыайыылаах хамаандаларга мэтээллэрин туттартаатыбыт. Субуотаҕа уопсай түмүктүүр тэрээһиҥҥэ сэртипикээттэрин, кубоктарын тэрийэр бөлөхпүт туттарыаҕа. Түгэнинэн туһанан өрөспүүбүлүкэбит бырабыыталыстыбатыгар, Ыччат министиэристибэтигэр уонна ХИФУ, 1 №-дээх ДЮСШ учууталларыгар махталбын биллэриэм этэ. Бары күүс-көмө буолан, маннык улахан тэрээһини ыыттыбыт диэн этиэм этэ.
Кыайыылаах хамаанда хамандыыра Степан Федоров санаатын үллэһиннэ:
— Биһиги эрдэттэн бэлэмнэнэн, ГТО-ҕа кыттыан сөптөөх ыччаппытын сүүмэрдээбиппит. Дима Чабыев, Карина Павлова, Шура Киселева, Айаал Иванов диэн оҕолорбут кытыннылар. Бу оҕолорбут кэлэр сайын Уус Алдан улууһугар спортивнай оонньууларга кыттыахтаахтар. Кыайыылаах тахсаммыт 30 тыһыынчалаах сэртипикээккэ тигистибит. Эҕэрдэлээһин бу субуотаҕа «Триумф” успуорт комплексыгар буолуохтаах. Тэрээһин олус үрдүк таһымнаахтык ааста диэн бэлиэтиэм этэ,. Уопсайынан маннык успуорка сыһыаннаах күрэхтэһиилэр ыччакка наһаа наадалаахтар.
Ульяна ЗАХАРОВА, «Саха сирэ».