Саха сирин оройуоннарыгар икки сыл иһигэр национальнай бырайыак чэрчитниэн ГТО («Готов к труду и обороне») нормативтарыгар бэлэмнэнэр уонна толорор былаһааккалары тэрийдилэр. Бу туһунан ГТО Саха сиринээҕи киинин салайааччы Александр Брызгалов ТАСС-ка иһитиннэрэр.
«2019 уонна 2020 сылларга национальнай бырайыагынан куонкурус ыытыллан, Саха сирин 22 оройуонугар 22 спортивнай былаһаакка турда. Ол иһигэр Арктика улуустарыгар эмиэ. Бу былаһааккаларга киһи этин-сиинин былчыҥын барытын эрчийэр тренажердар, воркаут, теннистиир остуол, баскетбол щитэ, скалолазтыыр истиэнэ уо.д.а. араас тэриллэр бааллар. Былаһааккалары оройуон кииннэригэр туруораллар. Манна ким баҕалаах барыта дьарыктаныан сөп», — диэн Александр Брызгалов иһитиннэрэр.
Кини бэлиэтииринэн, тренажердар тымныыны тулуйаллар. Аны 2024 сылга диэри атын улуустарга эмиэ маннык былаһааккалар баар буолуохтара.
Аммаҕа ГТО-ҕа бэлэмнэнэр былаһаакканы быйыл стадион иһигэр туруорбуттара. Манна спортсменнар эһиилги «Манчаары оонньууларыгар» бэлэмнэниэхтэрэ. Бу оонньууларга ГТО нормативын туттарбыт эрэ спортсменнар кытталлара ирдэнэр. Онон аммалар былаһааккалананнар үөрүүлэрэ муҥура суох.
edersaas.ru