Григорий Попов: “Ил Дархан биһиги спорпутугар болҕомто уурбутугар махтанабыт”

Ил Дархан кубогын сүрүн киирсиитинэн тайскай боксаҕа аан дойду чөмпүйүөнэ Григорий Попов кореец Ким Сунг Чжелыын киирсиитэ буолуоҕа. Ким кыайбыт MFP версиятынан Азия чөмпүйүөнүн аатын ылыаҕа.

Петр Павлов, «Саха сирэ» хаһыат, edersaas.ru

Григорийы кытта, ыйааһынын түһэринэн баран, спортсмен эйгэтин дьоно этэринэн, чөлүгэр түһүү түһүмэҕэр сырыттаҕына кылгастык кэпсэтэ сылдьыбыппын билиһиннэрэбин.

— Григорий, бэлэмнэнииҥ хайдах ааста?
— Бэлэм үчүгэй. Эрчиллиибин Мичил Осиповы кытта Таилаҥҥа аастым. Онно “Урааҥхай” кулууп салайааччыта Тургун Попов күүс-көмө, өйөбүл буолбутугар махталым улахан. Түгэнинэн туһанан, Ил Дархаммыт Егор Афанасьевич Борисов биһиги кулууппутун өйөөн, панкратиоҥҥа болҕомто ууран, маннык күрэхтэһиини тэрийэн ыытарыгар улаханнык махтанабыт. Биһиги кыахпытынан киирсиэхпит.

— Утарсааччыҥ Ким Сунг Чже туһунан тугу этиэҥ этэй?
— Кореецтар үгэс быһыытынан спорт бу көрүҥэр күүстээхтэр. Утарсааччым миигиттэн сааһынан балыс, түргэн, уопуттаах байыас. Ити кини куоһура. Ол гынан баран, ким күүстээҕин октагон көрдөрүөҕэ.

— Панкратиоҥҥа бу хаһыс киирсииҥ буоларый?
— Уопсайа уонча киирсиилээхпин. Бүгүҥҥү киирсиим — уон биирис киирсиим.

— Ыалдьааччыларга тугу этиэҥ этэй?
— Ыалдьааччыларга, бу күрэхтэһиини кэлэн көрөргүтүгэр ыҥырабын, биһиэхэ күүс-көмө, өйөбүл буоларгытыгар баҕарабын.

— Григорий, махтал! Биһиги бары, бүттүүн Саха сирэ бу киирсиигэ эйиэхэ ситиһиини баҕарабыт уонна эрэнэбит!

Ыспыраапка:

Ил Дархан кубогар аныгы панкратиоҥҥа күрэхтэһии аҥардас Саха сиригэр эрэ буолбакка, бүтүн Россия үрдүнэн бэлиэ түгэн. Быйыл ROAD FC биир мөлүйүөн доллар бириистээх аан дойдутааҕы турниры тэрийэн ыытыаҕа. Ити күрэхтэһиигэ чуолаан Ил Дархан кубогын кыттыылаахтарыттан (Герман Березкин, Эльнур Агаев, Евгений Лахин, Павел Гардеев) биирдэстэрэ Кореяҕа тиийэн Россия чиэһин көмүскүөҕэ.

Салгыы манна көр: https://edersaas.ru/il-darhan-kubogyn-kim-ylyaj/

Петр ПАВЛОВ, “Саха сирэ”, www.edersaas.ru