Тыа хаһаайыстыбатын сайыннарыыга “Хочо” МУП бэйэтин кыаҕынан Сунтаар улууһун Тойбохойугар этэҥҥэ үлэлии-хамсыы олорор. Хаһаайыстыба үлэтин-хамнаһын туһунан соторутааҕыта дириэктэринэн үлэҕэ анаммыт Григорий Семенович Готовцев санаатын маннык үллэһиннэ:
— Биһиги хаһаайыстыбабыт сүрүннээн үүт бородууксуйатынан дьарыктанар. Күҥҥэ 1т 200 киилэ үүтү Тойбохой, Дьаархан, Уһун Күөл, Аллаҥа, Маар Күөл, Бүлүүчээн нэһилиэктэриттэн тутабыт. Бу үүппүтүнэн үрүҥ ас арааһын (сүөгэй, йогурт, иэдьэгэй, быырпах уо.д.а) оҥорон таһаарабыт. Үүту тутарааччыларбытыгар үүт харчытын 50 бырыһыанын счеттарыгар ыыппыппыт. Улуус дьаһалтата Урбааны сайыннарыы пуондатын нөҥүө үп-харчы көрөн, үрүҥ аспытын кутар таарабытын эрдэ атыыласпыппыт, онон бу үлэ сезонугар тиийэр баар. Ол иһин билиҥҥи туругунан сыанабытын биир кэм тутан олоробут. Оҥорон таһаарбыт бородууксуйабытын Сунтаарга, Мииринэйгэ илдьэн атыылыыбыт. Холобура, Мииринэйгэ эргиэн туочукаларыгар илдьэн туттарарбытын хамаҕатык ылаллар.
Оҥорон таһаарыыны кэҥэтиигэ тохтоотоххо, күһүн 30 т эти астаан-үөллээн таһаарар соруктаахпыт. Ол курдук, 22 т –ынах этин, 8 т – убаһа этин. Кэтилиэт, пельмень, тефтель курдук полуфабрикаттары оҥоруохпут. Эбии оборудование ылар баҕалаахпыт. Урукку баар оборудование линиятын үлэҕэ бэлэмниэхпит. 40 т эти харайар холодильниктаахпыт. Уонна бу дьоҕус бэкээринэни үлэлэтэн эрэбит. Көрүөхпүт, хайдах буоларын. Күҥҥэ 90 килиэби буһаран таһаарыахтаах. Бэчиэнньэни, буулачыканы эҥин.
Биһиги 8 үлэһиттээхпит, сайыҥҥы үүттүгэннээх ыйдарга арыы сыахтара аһылыннахтарына, 11-15 киһиэхэ тиэрдиэхпит.
Онон “Хочо” МУП оҥорон таһаарыыны салгыы баһылаан, өрөспүүбүлүкэ Ил Дархана Айсен Николаев туруорбут соругун быһыытынан, нэһилиэнньэни олохтоох, бэйэбит бородууксуйабытынан хааччыйар үтүө баҕалаах.
Бэлэмнээтэ Женни Стрюкова
Хаартыскалары: Г.Готовцев ыытта