Сүрүн Уопсастыба

Григорьевтар: “Суората суох сатаммаппыт”

Уус Алдан улууһун Бэйдиҥэ сэлиэнньэтин олохтоохторо, оҕо иитэр дьиэ кэргэн Саина, Сергей Григорьевтар өрөспүүбүлүкэҕэ киэҥник биллэллэр. Элбэх оҕолоох ыал буолалларын быһыытынан сүөһүнү хото иитэллэр, үрүҥ аһынан дэлэччи аһыыллар. “Суората суох сатаммаппыт”, — дэһэллэр.

edersaas.ru

Билиҥҥи курдук эт, үүт аһылык сыанаҕа турар кэмигэр, бэйэ хаһаайыстыбалаах эрэ дьон сибиэһэй уонна чэпчэки аһылыгынан хааччынар. Григорьевтар сүөһүнү дэлэччи иитэллэр, оҕуруот олордоллор, сир астыыллар.

 

Уопсайа, 50 төбөлөөхпүт. Онтон 27 – ыанар ынах. Суораттанабыт, биирдэ эмэ иэдьэгэйдиибит, ийэм сайынын быырпах оҥорор, дэҥ кэриэтэ сыыр буһарынабыт. Оҕолорум ордук суораты сөбүлүүллэр. Сарсыарда, киэһэ суората суох табыллыбаттар.

Кылгас сайыммытыгар сир аһыттан барытыттан хаһаанарга талаһабыт. Сүрүннээн хаптаҕаһы, отону хото үргүүбүт, кыргыттар эбии дьэдьэннииллэр, сугуннууллар.

Хортуоппуй ыһабыт, оҕуруот аһын арааһын олордобут, күһүнүн тэллэйдиибит, — диэн ыал ийэтэ Саина Егоровна кэпсиир.

Григорьевтар кылгас сайыны туһалаахтык атаарарга кыһаналлар. Хонуу лууга ситиэҕиттэн кииһилэтигэр, эмтээх үүнээйитигэр тиийэ хомуйаллар. Кииһилэни барыанньалыыллар, кыһыҥҥыга кытта хаһааналлар. Онон күөх сайыны ыалынан туһалаахтык атаараллар.

 

Людмила ПОПОВА, “Саха сирэ” хаһыат, edersaas.ru

2
0
Telegram @edersaas20