Киин куораты уонна чугастааҕы уон улууһу уотунан уонна сылааһынан хааччыйар ГРЭС, ГРЭС-2 эбийиэктэригэр кэлэр кыстыкка бэлэмнэнэн, хапытаалынай өрөмүөн үлэтэ күргүөмнээхтик бара турар.
edersaas.ru
«Якутскэнерго» хампаанньа пресс-сулууспата иһитиннэрэринэн, бэс ыйыгар ГТУ-8 өрөмүөннэнэн, билигин ГТУ-1 оҥоһуллан, турбина сапчааһа уларыйан алтынньы саҥатыгар үлэҕэ киириэхтээх. Балаҕан ыйа бүтүөр диэри өссө түөрт установка саҥардыллыахтаах.
От ыйыгар оборудование хайдах үлэлиирин бэрэбиэркэлээн, кэтээн көрбүттэрэ. Билигин ЯГРЭС-2 хочуолларын агрегаттара, компрессорнай установка өрөмүөннэнэр.
«Кэлэр кыстыгы этэҥҥэ туоруур, нэһилиэнньэни тиһигин быспакка уотунан уонна сылааһынан хааччыйар туһугар ыстаансыйаҕа хапытаалынай өрөмүөн ыыта сылдьабыт. Генерирующай установка сороҕо саҥардылынна, оттук сезона саҕаланыар диэри сылааһынан хааччыйар оборудование оҥоһуллуохтаах, ууну сылытар хочуолунай тутуллан бүтүөхтээх», — диэн эттэ «Якутскэнерго» генеральнай дириэктэрэ Александр Слоик.
Марианна Тыртыкова, «Саха сирэ», edersaas.ru