«Якутскэнерго» икки тутаах салаата – Дьокуускайдааҕы ГРЭС уонна ТЭЦ киин куорат олохтоохторун сылааһынан хааччыйаллар.
Быйыл энергетиктэр балаҕан ыйын 4 күнүттэн саҕалаан оҕо уһуйааннарыгар, оскуолаларга, социальнай тутууларга сылааһы биэрбиттэрэ, онтон балаҕан ыйын 7 күнүттэн – олорор дьиэлэргэ.
Тымныы кэмҥэ бэлэмнэнии чэрчитинэн, Дьокуускайдааҕы ТЭЦ үлэһиттэрэ уонна кинилэр бэдэрээтчиттэрэ хочуолу, ону тэҥэ итиини биэрэр уопсайа 8 км усталаах ситими, итии уунан хааччыйар 10,5 км уонна тымныы уунан хааччыйар 7,8 км ситимнэри өрөмүөннээтилэр. Дьокуускайдааҕы ГРЭС энергетиктэрэ 10 ситим носуоһун, көмө тэриллэри уонна сылааһынан хааччыйыыга аналлаах арматураны бэлэмнээтилэр.
Былаан быһыытынан, сотору кэминэн Дьокуускайдааҕы иккис нүөмэрдээх ГРЭС үлэлээтэҕинэ, куорат олохтоохторун сылааһынан хааччыйыы ноҕуруускатын сороҕун бэйэтигэр ылыныаҕа.
Саргылана Савватеева, «Эдэр саас» сайтка анаан