Өрөспүүбүлүкэ олоҕор-дьаһаҕар дьоһун суолталаах баараҕай тутуу – Дьокуускайдааҕы иккис нүөмэрдээх ГРЭС үлэҕэ киириитин сиэригэр-туомугар дойду премьер-миниистирэ Дмитрий Медведев кыттара сабаҕаланар.
edersaas.ru
Ол курдук, станция официальнайдык аһыллыытын тэрээһинэ бүгүн киэһэ 19.00 чааска ыытыллыахтаах. Ил Дархан Егор Борисов, РФ бырабыыталыстыбатын бэрэссэдээтэлэ Дмитрий Медведев, «РусГидро» салайааччыта Николай Шульгинов видеокэмпириэнсийэ көмөтүнэн федеральнай киинтэн сибээскэ тахсаллара күүтүллэр. Ол курдук Егор Афанасьевич Уһук Илин уонна Байкал эрэгийиэнин социальнай-экономическай сайдыытыгар туһуламмыт сүбэ-мунньахха кыттыахтаах. Мунньаҕы РФ премьер-миниистирэ Дмитрий Медведев салайан ыытыахтаах.
Дьокуускайдааҕы ГРЭС-2 «РусГидро» ПАУо түөрт улахан инвестиционнай бырайыактарыттан биирдэстэринэн буолар. Уһук Илиҥҥэ энергетическэй эбийиэктэр дойду бэрэсидьиэнэ Владимир Путин ыйааҕыгар олоҕуран тутуллаллар
Егор Афанасьевич этэринэн, иккис станция үлэҕэ киллэриллиитэ өрөспүүбүлүкэ сайдыытыгар улахан суолталаах түгэнинэн буоларынан сибээстээн, киин энергооройуон уонна Дьокуускай куорат электричество уотунан эрэллээхтик хааччыллыахтара.
Ыспыраапка:
Станция 193 Мвт кыамталаах, 460 Гкал/ч сылааһы уонна сылга 1 440,407 мөл. кВтч электроэнергияны оҥорон таһаарар кыахтаах. Бырайыак быһыытынан инженернэй инфраструктуратын, суолун-ииһин тутуу үбүлээһинин барытын “Илиҥҥи энергетическэй ситимнэр РАУо” бэйэтигэр ылыммыта. Сүрүн бэдэрээтчит – «ТЭК Мосэнерго» уонна да атын дьоҕус тэрилтэлэр станция икки былаһааккатынан үлэлээтилэр.
Анивера АКИМОВА, «Саха сирэ» хаһыат, edersaas.ru