Ил Дархан бүгүн Анатолий Бравины гражданскай уопсастыба сайдыытын миниистиринэн анаата.
Бүгүн Ил Түмэн пленарнай мунньаҕа, бу дуоһунаска үлэлээн кэлбит Сардаана Гурьеваны СӨ Киһи быраабыгар боломуочуйалааҕын дуоһунаһыгар бигэргэттэ. Ил Дархан Егор Борисов «миниистиринэн кими аныырбын номнуо быһаарынан сылдьабын, Ыйаах таҕыстаҕына истиэххит» диэн блогердары кытта көрсүһүүтүгэр соторутааҕыта эппитэ оруннаах буолан таҕыста. Гурьева норуот дьокутааттарыгар бигэргэнээтин кытта, аҕыйах чаас буолаат, чахчы атын миниистир ананар Ыйааҕа тахса оҕуста.
Анатолий Дмитриевич Бравины кэпсиир буоллахха, 1962 сыллаахха Таатта улууһугар төрөөбүт. Бу күҥҥэ диэри СӨ Ил Дарханын иһинэн үлэлиир Информационнай киин дириэктэрэ (2001-2017) этэ. 1994-2001 сылларга СӨ Норуоттарын дьыалаларыгар уонна федеративнай сыһыаннаһыыларга миниистирин бастакы солбуйааччынан үлэлээбиттээх.
Миниистири солбуйааччылар:
- Луцкан Иван Петрович, миниистири бастакы солбуйааччы
- Иванова Лена Степановна, миниистири солбуйааччы
Прокопий БУБЯКИН, https://edersaas.ru