Граннары бэрээдэктээн, Саха сиригэр биир пуорманан аан бастаан ыыттылар
Быйыл Саха сиригэр кэмиэрчэскэйэ суох тэрилтэлэри гранынан өйөөһүн куонкуруһа РФ бэрэсидьиэнин гранын ыытыы пуорматын усулуобуйатыгар сөп түбэһиннэрэн, аан бастаан ыытылынна.
edersaas.ru
Ол түмүгэр 56 мөл. солк. суумалаах өйөбүлүнэн 43 социальнай хайысхалаах бырайыак туһанар буолла.
2020 сыллаахха өрөспүүбүлүкэҕэ кэмиэрчэскэйэ суох тэрилтэлэргэ граннары биэрии бэрээдэктэммитэ. Ол курдук, 11 грант бэриллэр куонкуруһун бииргэ мунньан холбоон, биир уопсай туспа тэрээһин быһыытынан ыытыллара бигэргэммитэ. Төрүөтэ — куонкурус РФ бэрэсидьиэнин гранын ыытыы тэрээһинин курдук усулуобуйалаах барар буолбута. Докумуону тутуу эмиэ бу куонкурус ирдэбилигэр сөп түбэһэр. Ол ону grants.yakutia.click анал саайтка киирэн көрүөххэ сөп.
Бастакы кэлим куонкуруска грант 16 хайысхатыгар Саха сириттэн 256 сайаапка киирбит. Бу бырайыактары үөрэтэн көрөн баран, 56 мөл. солк. 43 социальнай хайысхалаах бырайыагы талан ылбыттара. Кыайыылаахтар ордук култуура, ускуустуба, духуобунас эйгэлэригэр, обургу оҕолор буруйу оҥорууларын бохсор, адаптивнай физкультураны сайыннарар уонна тулалыыр эйгэни уонна кыылы-сүөлү харыстааһын тиэмэлэригэр бырайыактарын көсмүскээтилэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн