Улахан куонкуруһу ааһан, “Бааһынай хаһаайыстыба базатыгар дьиэ кэргэн пиэрмэтин тэрийии” федеральнай бырагыраама гранын ылар чиэскэ 25 бааһынай хаһаайыстыба салайааччыта тигистэ.
edersaas.ru
От ыйын 6 күнүгэр Тыа хаһаайыстыбатын министиэристибэтигэр кинилэргэ анаан, бырагырааманан үлэлиэхтээх биэс сылларын устата үлэ көдьүүһүн хайдах үрдэтэр туһунан сэминээр тэрилиннэ.
Сэминээргэ тыа хаһаайыстыбатын миниистирин солбуйааччы Николай Афанасьев, министиэристибэ сүөһүнү иитиигэ, племенной үлэҕэ уонна кэпэрээссийэҕэ, хаһаайыннааһын дьоҕус киэптэригэр департаменын салайааччыны солбуйааччы Айаал Тимофеев, “Росстат” Саха сиринээҕи салаатын тыа хаһаайыстыбатын статистикатыгар уонна экологияҕа салаатын салайар Кыдаана Егорова, Федеральнай казначейство управлениетын федеральнай реестргэ салаатын салайар Аина Антонова итиэннэ үпкэ-харчыга, нолуокка сыһыаннаһыы эйгэтин исписэлиистэрэ кытыннылар. Кинилэр бааһынайдары субсидияларга сөбүлэһиилэри түһэрсии, отчуоту оҥоруу, сирэй счеттары арыйыы уонна нолуоктааһын ымпыктарыгар-чымпыктарыгар үөрэттилэр.
Сэминээри түмүктүүрүгэр Николай Афанасьев “Бааһынай хаһаайыстыба базатыгар дьиэ кэргэн пиэрмэтин тэрийии” федеральнай бырагыраама гранын сэртипикээттэрин туттартаата. “Бааһынай хаһаайыстыба базатыгар дьиэ кэргэн пиэрмэтин тэрийии” федеральнай бырагырааманан быйыл 140 мөл. солк. көрүлүннэ.
Раиса Сибирякова, «Саха сирэ» хаһыат, edersaas.ru
