Дьокуускай куорат биир гостиницатыгар хоно-өрүү сыппыт дьонтон биирдэстэрэ ааны алдьаппытын, кырыктаахтык суоһурҕанарын туһунан иһитиннэрии полицияҕа администратортан киирбит.
Быһылаан сиригэр тута патруллуур-постовой сулууспа нэрээтин ыыппыттар. Онно тиийэн, полицейскайдар кыыла турбут эдэрчи киһини туппуттар.
Бу Уус Маайаттан төрүттээх 29 саастаах киһини бэрэбиэркэлээһин кэмигэр туруусугуттан полиэтиленовай пакетикка угуллубут синтетическэй веществону булбуттар.
Экспертиза быһаарбытынан, бу вещество 0,974 г ыйааһыннаах спайс эбит.
Тутуллубут киһи полицейскайдарга билиммитинэн, ойоҕуттан гостиницаҕа саһа сытан, наркотик туттар эбит.
Бу чахчынан РФ Холуобунай кодексатын 228-с ыст. 2-с чааһынан холуобунай дьыала тэриллибит. Ол эбэтэр, наркотигы сокуоннайа суохтук ылыы, харайыы, таһыы, оҥоруу бэлиэтэ баарынан. Бу ыстатыйанан көрүллэр накаастабыл миэрэ — 10 сылга диэри болдьоххо көҥүлү быһыы.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.